Медицина оешмасы янәшәсендә сыра саталар

2017 елның 1 ноябрендә Татарстан Республикасы Дәүләт алкоголь инспекциясенең Зеленодол территориаль органы белгечләре РФ Эчке эшләр министрлыгының Зеленодол районы буенча бүлеге хезмәткәрләре белән берлектә Зеленодол шәһәренең Комаров урамында медицина оешмасы тирәсендә урнашкан агызып сатыла торган эчемлекләр кибетендә алкогольле продукция сату фактын ачыклады.

Нәтиҗәдә биредә  330 л күләмендә хәмер продукциясе әйләнештән алынды. Хосусый эшмәкәр вәкиле белән әңгәмә барышында вәкилнең үзенең дә, шулай ук хосусый эшмәкәрнең дә бу сәүдә объектында алкогольле продукция сатуның закон нигезендә тыелуын белүе ачыкланды.

Эшмәкәргә беркетмә төзү өчен килү зарурилыгы турында белдерү кәгазе җибәрелде.