Кулланучы хокуклары турында... кибеттән белеп кайтабыз

 Татарстан Республикасы Дәүләт алкоголь инспекциясенең Казан территориаль органы белгечләре халыкны кулланучылар хокукларын яклау өлкәсендә кирәкле мәгълүматлар белән таныштыру өчен теләсә кайсы мөмкинлектән файдаланып калырга тырыша. Узып баручы елның соңгы аенда Татарстан Республикасы Дәүләт алкоголь инспекциясенең Казан территориаль органы эчке базарны үстерү һәм координацияләү бүлеге белгечләре “Кулланучы хокуклары турында урында беләбез” дигән акция үткәрә. Чарага Казан шәһәре һәм ведомство карамагындагы районнарның 100ләп сәүдә оешмасы җәлеп ителәчәк.

Акция кибетләр һәм супермаркетларның сәүдә залларына кулланучылар хокукларын яклау өлкәсендә төрле мәсьәләләрне үз эченә алган буклетлар урнаштырып-таратып чыгудан гыйбарәт. Мәгълүмати материаллар кассалар тирәсенә күренеп торган урыннарга урнаштырылачак. Шулай итеп, кибеткә килүчеләр берочтан Татарстан Республикасы Дәүләт алкоголь инспекциясе әзерләгән буклетларга да ия булып, үзләрен борчыган сорауларга җаваплар табачак.

“Кулланучы хокуклары турында урында беләбез” акциясе Биектау районында урнашкан сәүдә предприятиесе –  № 3222 «Пятерочка» кибетеннән (Биектау авылы, Зур Кызыл урамы, 93 йорт) башланып китте.