Васильево бистәсендә хәмер сату законын бозалар

2018 елның 26 гыйнварында ТР Дәүләт алкоголь инспекциясенең Зеленодол территориаль органы хезмәткәрләре Зеленодол районының Васильево бистәсендәге бер кибеттә алкогольле продукция сату кагыйдәләрен һәм законын бозу фактларын ачыклады.

Болар – алкогольле продукцияне сату вакытын чикләүне санга сукмау, төяп җибәрү турында мәгълүматлары Бердәм дәүләт автоматлаштырылган мәгълүмат системасында (ЕГАИС) теркәлмәгән продукцияне сату, шулай ук әйләнештә йөртү һәм җитештерүнең легальлеген раслаучы товарны озату документларыннан башка гына хәмер сату.

Шулай итеп, 15,5 л күләмендә хәмер продукциясе – сыра легаль булмаган әйләнештән алынды.

Закон бозучыга карата Административ хокук бозулар турында Россия Федерациясе кодексының 14.16 статьясындагы 2 һәм 3 өлешләре, 14.19 статьясы буенча административ хокук бозулар турында беркетмәләр төзеләчәк.