Россия гадел хөкем дәүләт университетында семинар үткәрдек
Татарстан Республикасы Дәүләт алкоголь инспекциясе Казан территориаль органының эчке базарны үстерү һәм координацияләү бүлеге хезмәткәре Россия гадел хөкем дәүләт университетының Казан филиалы суд системасы өчен белгечләр әзерләү факультетының 3 курс студентлары белән очрашу үткәрде.
Чарада студентларга иң элек кулланучылар хокукларын яклау өлкәсендәге хокукый мөнәсәбәтләрне җайга салучы законнар һәм норматив-хокукый актлар турында мәгълүматлар ирештерелде, үз хокукларының санга сугылмавы очрагында кулланучыларның нинди хаталар җибәрүе тикшерелде. Бигрәк тә еш очрый торган хәлләр кулланучы, шулай ук сатучы (җитештерүче) күзлегеннән бәйнә-бәйнә каралды.
Булачак юристлар белән очрашуның икенче өлеше “сорау-җавап” рәвешендә узды. Егет-кызлар мәсьәләләрне карап тикшерү барышына актив төстә кушылып, проблемаларны хәл кылуның, сыйфатсыз товарлар буенча таләпләр куюның дөрес юлларын күрсәтте, төрле сораулар бирде.
Әңгәмә сәгать ярым дәвам итте. Студентлар мавыктыргыч, ә иң мөһиме – үзләре өчен үтә дә кирәкле семинар үткәргән өчен Татарстан Республикасы Дәүләт алкоголь инспекциясенең Казан территориаль органы белгеченә җылы рәхмәт сүзләре ирештерде. Егет-кызларга яңа белемнәренең киләчәктә уңышлы эшләүләренә, тормышта үз урыннарын табуга ярдәм итәсенә ышанабыз.