Лицензия– тыныч эшләү нигезе, яки Кузнецов әфәнде, җитәр сиңа, бәлки!

Мәгълүм булганча, хәмер (сырадан һәм сыра эчемлекләреннән тыш) сату эшчәнлеген бары тик оешмалар гына һәм аларның да билгеле бер шартларга, кирәкле документларга ия булганнары гына хәл итә ала. Хосусый эшмәкәрләр дә сыра һәм сыра эчемлекләре белән  генә сәүдә итүгә хокуклы. Ә инде үз эшчәнлекләрен рәсми төстә теркәмәгән гражданнарның, әлбәттә инде, бу эшчәнлеккә хокуклары юк.

Татарстан Республикасы Дәүләт алкоголь инспекциясе алкогольле продукцияне ваклап сату буенча лицензиясез һәм законсыз эшчәнлеккә каршы “сугыш сукмагы”на басты һәм бу юлдан нык адымнар белән китте дә. Шулай булмыйни, “дошманнар” саны бик зур, һәм алар үтә дә оятсыз, әрсез бит. Әйтергә кирәк, ведомство эшенә уяу гражданнарыбызның да ярдәме зур. Алар төрле ысуллар белән (Интернет-кабул итү бүлеге, “кайнар линия” аша) хәмер сатуда төрле закон бозулар турында хәбәр итеп тора.

Шул рәвешле Казан шәһәрендә 2012 елның ноябрендә генә дә лицензиясез эшчәнлекнең 16 очрагы ачыкланды. Кайбер оешмаларның лицензиясенең гамәлдә булу срогы чыккан, теге яки бу хосусый эшмәкәр, эшчәнлеге формасын үзгәртеп, лицензия рәсмиләштерергә вакыт тапмаган... Алай гынамы, хәтта ки кайбер өлгер гражданнарыбыз, килеп чыккан форсаттан файдаланып, арендага алган бүлмәсендә шыпырт кына хәмер сатып яткан. Әле ярый хәмере әйбәт булса...

Әйтик, лицензиясез эшчәнлек җәелдереп җибәргән К.Г. Кузнецов дигән гражданин соңгы ике ай эчендә генә әллә ничә тапкыр тотылды инде. Сәрхүшләреннән тәмам туйган күрше йортта яшәүчеләр законсыз эшчәнлеге турында һаман җиткереп торуларына, үзенең даими рәвештә гражданнар “кармагында” булуына карамастан, хәсрәт бизнесменның  “идән асты” бизнесын ябарга уйлаганы да юк. Аннан соңгы тапкыр – 2012 елның 19 ноябрендә 28 төрдәге, гомуми күләме 30 литрдан артып киткән (гомуми бәясе 6635,50 сум) алкогольле һәм спиртлы продукция законсыз әйләнештән алынды. “Бизнесмен”ның эш материаллары кабат судка җибәрелде. Әмма Кузнецов әфәндене гамәлдәге штраф суммалары куркытмый, күрәсең, Керемнәре аларны капларга гына җитәдер шул...

Кузнецов кебекләрнең куркусызлыгы лицензиясез эшчәнлек өчен штрафлар күләменең лицензия өчен дәүләт пошлинасы күләменә караганда кимрәк булуы белән аңлатыладыр, бәлки? Шулай икән, аларга озакламый штрафларның нык артуын белеп тору зыян итмәстер.

Әлегә исә ТР Дәүләт алкоголь инспекциясе эчке эшләр органнары, прокуратура, муниципаль органнар белән берлектә республикабызның алкоголь базарын тәртипкә салу буенча мөмкин булган законлы барлык чаралар күрүне дәвам итә.