2012 елның 10 аенда ачыкланган лицензиясез эшчәнлек очраклары 2 тапкырга арткан

Татарстан Республикасы Дәүләт алкоголь инспекциясенең контроль-инспекция бүлеге начальнигы Т.М. Хәбибуллина: “Лицензиясез эшчәнлек, кагыйдә буларак, ялган хәмер продукциясе, ялган маркалы продукция сатуга китерә”.

Быелның 10 аенда (2011 елның шушы ук чоры белән чагыштырганда) алкогольле продукцияне тиешле лицензиясез сату очраклары 2 тапкырга диярлек арткан. Бу җәһәттән Чаллы территориаль округына тиңнәр юк: 2011 елның шушы ук чорында 21 шундый очрак ачыкланган булса, быел – 60! Чаллы шәһәренең үзендә генә дә лицензиясез эшчәнлекнең 44 очрагы билгеле булган. Чагыштыру өчен: 10 ай эчендә Казанда һәм башкалабызга якын урнашкан дүрт районда нибары 43 шундый очрак теркәлгән. Татарстан Республикасы Дәүләт алкоголь инспекциясенең контроль-инспекция бүлеге начальнигы Т.М. Хәбибуллина бүген “Татмедиа” да үткәрелгән матбугат конференциясендә әнә шундый күңелсез хәлләр турында хәбәр итте.

Лицензиясез эшчәнлек, кагыйдә буларак, ялган хәмер продукциясе, ялган маркалы продукция сатуга китерә. ТР Дәүләт алкоголь инспекциясе хезмәткәрләре 9 шундый очракны ачыклаган.

“Без ялган алкогольле продукция сату күләме үсүен фаразлыйбыз. Бу фаразыбыз иң элек 2013 елның 1 гыйнварыннан ваклап сатуда ярты литр аракының минималь бәясе 170 сумга җитәсенә бәйле. ТР Дәүләт алкоголь инспекциясе, әлбәттә, хокук саклау органнары белән берлектә, ваклап сатуда ялган алкогольле продукцияне калдырмау өчен мөмкин булганның барын да эшләячәк”, – диде Татьяна Михайловна.

ТР Дәүләт алкоголь инспекциясе агымдагы елның 10 аенда 2977 тикшерү һәм административ тикшерү уздырган, шул исәптән алкогольле һәм спиртлы продукция әйләнеше өлкәсендә – 1569 тикшерү.

Хуҗалык итүче 2312 субъектта  гамәлдәге законны бозулар билгеләнгән (шул исәптән алкогольле һәм спиртлы продукция әйләнеше өлкәсендә – 1352). 2011 елның шушы ук чоры белән чагыштырганда, гамәлдәге законны бозган субъектлар саны 20,2 процентка арткан.

Татьяна Хәбибуллина әйтүенчә, үзебезне, шулай ук якыннарыбызны сыйфатсыз хәмер корбаннарына әйләнүдән саклап калу өчен аны алкогольле продукцияне ваклап сатуга лицензиясе булган кибетләрдән генә сатып алу зарури. Кулдан, Интернет аша, хәтта таныш-белешләр аша очсызлы хәмергә кызыкмаска кирәк. Легаль төстә җитештерелгән аракының 0,5 литры 125 сумнан ким була алмый.

Алкогольле продукциянең легальлеген шешәсенә карап та белергә була: аның этикеткасы һәм контрэтикеткасы тигез итеп ябыштырыла, бөкесе борылып йөрми, шешәсенә акциз маркасы яки федераль махсус марка ябыштырыла. Шешә эчендә берни “йөзми”, төбенә берни утырмый. Сатучы легаль җитештерелгән продукциясенә сатып алучының таләбе буенча товарны озату документлары: товар-транспорт накладноен, аңа белешмә (А һәм Б бүлекләре) яисә таможня декларациясенә белешмә (чит илдә җитештерелгән продукция өчен) күрсәтергә тиеш.

Моннан тыш республика территориясендә легаль төстә сатыла торган барлык алкогольле продукциянең уникаль партия коды (УКП) бар. Татарстан Республикасында җитештерелгән продукциягә УКП шешә бөкесенә  принтер ярдәмендә сугыла, ә республика территориясенә кертелә торган продукциядә – штрихкоды астындагы махсус ябыштырып куелган кәгазьгә языла.