Пенсионер һәм рациональ кулланучы төшенчәләрен берләштерәбез
Ел саен, 15 нче март көнне билгеләп үтелә торган Бөтендөнья кулланучылар хокукларын яклау көне уңаеннан, Чаллы шәһәренең «Хезмәт ветераннары өчен пансионат» муниципаль автоном учреждениесендә ял итүче хезмәт ветераннары ТР Дәүләт алкоголь инспекциясенең Чаллы территориаль органы белгечләре белән очрашты.
2020 елда бәйрәм «Рациональ кулланучы» шигаре белән уздырыла, аның тематикасын Халыкара кулланучылар оешмалары федерациясе билгели, һәм ул бүгенге көндә дә бик актуаль. Кешелек алдында торган күпсанлы экология һәм әйләнә-тирә мохит проблемалары хәлне катлауландыра һәм, тормышның социаль шартларын яхшырту максатында, Бөтендөнья кулланучылар оешмасы табигать ресурсларыннан нәтиҗәле файдалануга, калдыкларны эшкәртүгә һәм аларны киметүгә чакыра. Бу актуаль темага әйдәүче белгечләр бүген пансионатта ял итүче пенсионерлар белән аралашты. Чара «Кулланучыларның хокукларын яклау турында» 1992 елның 7 февралендәге 2300-1 номерлы РФ Законы статьяларын аңлатып, бердәм уңай атмосферада узды. Хәзерге сменада 24 кеше ял итә, аларның барысы да чарада актив катнашты. Тормыш хәлләренә бәйле сораулар булды:
Сыйфатсыз азык-төлек товарлары һәм аларны кире кайтару тәртибе турында;
Нинди азык-төлек булмаган товарларны алмаштырырга була, ә нинди товарларны юк;
Товарга гарантияле һәм гарантияле булмаган ремонт үткәрү сроклары турында.
Ял итүчеләрне Кире кайтарып яки шундый ук үлчәмдәге, форма, габарит, фасон, төс яки комплектациядәге башка товарга алмаштырып булмый торган сыйфатлы азык-төлек булмаган товарлар исемлеге белән таныштырдылар, нигездә алар сатып ала торган товарларга игътибар юнәлттеләр. РФ Хөкүмәтенең «Техник яктан катлаулы товарлар исемлеген раслау турында» 2011 елның 10 ноябрендәге 924 номерлы карары белән таныштырдылар.
Барлык катнашучыларга да ТР Дәүләт алкоголь инспекциясе тарафыннан эшләп чыгарылган, 71-43-03 номеры буенча «кайнар линия» телефоны эше турында мәгълүмат урнаштырылган буклетлар тапшырылды, әлеге телефон аша теләге булган һәркем кулланучыларның хокукларын яклау мәсьәләләре буенча профессиональ ярдәм алырга мөмкин. Истәлек өчен фотога төштеләр.