“Яшьләр – коррупциягә каршы” лозунгы белән марафон булды

Марафон Халыкара коррупциягә каршы көрәш көненә (ел саен 9 декабрьдә билгеләп үтелә) багышлап уздырылды. ТР Дәүләт алкоголь инспекциясенең Әлмәт территориаль органында җәмгыятьтә коррупциягә каршы карашны пропагандалауга, коррупция чагылышларына нәфрәт уятуга юнәлдерелгән чаралар үткәрелде. Аерым алганда, тематик класс сәгатьләре, диспутлар, конкурслар һәм иҗат эшләре күргәзмәләре һәм коррупциягә каршы юнәлештәге башка чаралар оештырылды.

2012 елның 18 декабрендә иҗат эшләре күргәзмәсе булды. Анда ТР Дәүләт алкоголь инспекциясенең Әлмәт территориаль органы хезмәткәрләре балалары катнашты. Күргәзмә яшьләр арасында коррупциягә каршы культураны формалаштыру максатыннан чыгып оештырылды. Рәсемнәр күргәзмәсе яшьләргә җәмгыятьтә коррупция проблемаларына карата дөрес караш тудыру, яшьләрнең илебезнең иҗтимагый тормышында, социаль мәсьәләләрне хәл кылуда (шул исәптән иҗади рәвештә) катнашуына кызыксындыру тудыру мөмкинлеге бирәчәк, дип уйлыйбыз.

Иҗат эшләре күргәзмәсе территориаль орган хезмәткәрләренә, шулай ук күргәзмәгә килүчеләргә бик ошады. Бирегә килгән халыкның барчасы иҗат эшләрен бик игътибар белән карады, балаларның хезмәтләрендә тудырылган образларны барлады, рефератларда язылган сүзләрнең асылына җентекләп төшенде. Территориаль орган хезмәткәрләренең балалары коррупцияне елан, шүрәле, аждаһа, карга һәм башка персонажлар рәвешендә күз алдына китерү мөмкинлеге бирде.

Әлмәт территориаль органы хезмәткәрләре муниципаль берәмлекләр тарафыннан балалар өчен үткәрелеп килә торган чараларда да актив катнаша. Алар 2012 елның 17 декабрендә Баулы шәһәренең “Нефтьче” спорт комплексында балалар, егетләр һәм кызлар арасында “Яшьләр – коррупциягә каршы” дигән лозунг белән  уздырылган “Самурай марафоны”нда катнашты.  Марафонга Зәй, Лениногорск, Әлмәт, Октябрьск, Шаран, Туймазы шәһәрләреннән төрле яшьтәге 100дән артыграк спортчы җыелды. Марафонда Баулының яшь спортчыларын самурайларга багышлау, “БАРС” кекусинкай каратэ клубының күрсәтмә чыгышлары, ярышлар булды. Чарада катнашучылар алдында Баулы муниципаль районы башлыгы урынбасары һәм район башлыгының коррупциягә каршы көрәш буенча ярдәмчесе чыгыш ясады.

Халыкара коррупциягә каршы көрәш көненә багышланган чаралар үткәрү, балалар белән аралашу барышында шул ачыкланды: балалар, әле бик яшь булуларына карамастан, коррупциянең афәт икәнлеген һәм аңа каршы көрәшергә кирәклеген, рәхим-шәфкатьнең һавадан төшмәвен – аның үзебездән торуын: һәрберебезнең намусы чиста булганда гына коррупциягә каршы көрәшнең уңышлы килеп чыгуын аңлый.