Аеклык зонасы

Документта төбәкләр хакимиятләренең урыннарда хәмер кулланырга ярамый торган зоналарны билгеләү кагыйдәләре күздә тотылган.

Исегезгә төшереп үтик: законда хәмерне кайбер урыннарда: әйтик, мәктәпләрдә, хастаханә, аэропорт, вокзалларда һәм хәрби объектларда, шулай ук кешеләрнең күпләп җыелу урыннарында сату тыелган. Хәзер исә аеклык зоналары тагы да киңәйтеләчәк: законда санап үтелгән оешмалар территорияләрен дә хәмер сатучылардан арындыру таләп ителә.

Россия Хөкүмәте карарында аеклык зоналары чикләрен билгеләү тәртибе тәфсилләп күрсәтелгән. Мәсәлән, безгә РФ Сәнәгать һәм сәүдә министрлыгыннан аңлатуларынча, муниципалитетлар законда санап үтелгән барлык оешмалар өчен дә бертигез ераклыктагы хәмерсез зоналар билгеләргә тиеш. “Коррупциягә юл калдырмас өчен, урыннарда “кирәкмәс” эшмәкәрләргә өстәмә киртәләр барлыкка китермәс өчен күздә тотылган чара бу, – ди экспертлар. – Шул ук вакытта, җирлекнең һәм корылманың конкрет үзенчәлекләрен исәпкә алу мөмкинлеге булдыру өчен, җирле хакимиятләр әлеге ераклыкны 30 процент чигендә үзгәртә алачак”.

Башкача әйткәндә, карарда төгәл генә ераклык юк: метраж җирле хакимиятләр каравында кала. Әмма дистанция бер үк төрле булырга тиеш. Хакимияттәгеләрнең танышлары өчен – бер ераклык, читләр өчен – икенче ераклык була алмый. Фәкать, җирле шартларга бәйле рәвештә, аз-маз үзгәртү генә рөхсәт ителә. Экспертлар аңлатуынча, карардан соң төбәкләрдә  күпме ераклыкта хәмер сатарга ярамавы исәпләп чыгарылачак.

“Хәмер эчемлекләре адым саен сатылмаганда, ягъни гражданнардан, шул исәптән үсмерләрдән читтәрәк булганда, аларны сатуның кимиячәгенә өметләнәбез”, – дигән фикердә РФ сәнәгать һәм сәүдә министры урынбасары Виктор Евтухов. Моннан тыш, документта алкогольне ваклап сату тыелган урыннар – кешеләрнең күпләп җыелу урыннары, шулай ук балалар, мәгариф, медицина оешмалары һәм спорт объектлары төшенчәләренең аңлатмалары бирелгән. Законда бу терминнарның барысы да бар, әмма тормышта аңлашылмаучанлыклар килеп чыкмасын өчен, аларны тәфсилләп аңлатып бирергә кирәк. Әйтик, документта гражданнарның күпләп җыелу урыны “Җыелышлар, митинглар, демонстрацияләр, урамда йөрүләр һәм пикетка чыгулар турында” Закон нигезендә оештырыла торган, кимендә 100 кешенең катнашуы белдерелгән халык катнашында чара үткәрү урыны кебек билгеләнә.