Үсмерләр һәм яшьләр арасында эчкечелекне, тәмәке тартуны кисәтү

Ни кызганыч, бүгенге яшьләр инде мәктәптә укыган чактан ук хәмер тәмен белеп үсә. Әйе, саннар нәкъ менә шул хакта сөйли. Моңа бәйле рәвештә ТР Дәүләт алкоголь инспекциясенең Әлмәт территориаль органы 2013 елда яшьләр арасында хәмер һәм тәмәке куллануны киметү буенча профилактика эшен дәвам иттерәчәк.

Бу бурычны тормышка ашыру максатыннан чыгып, территориаль орган белгечләре “Мәгариф идарәсе” МУ хезмәткәрләре белән берлектә шәһәрнең гомуми белем бирү учреждениеләрендә лекцияләр, шулай ук күп кенә башка чаралар үткәрә.

Әйтик, быелның 21 гыйнварында Әлмәт муниципаль районы башкарма комитетында муниципаль район территориясендәге гомуми белем бирү учреждениеләре һәм сәүдә объектлары җитәкчеләре белән киңәшмә уздырылды. Киңәшмәдә балигъ булмаганнарның алкогольле продукция, шул исәптән сыра һәм сыра эчемлекләрен куллануларына (эчү) юл куймау мәсьәләсе тикшерелде.

Киңәшмә барышында ТР Дәүләт алкоголь инспекциясенең Әлмәт территориаль органы хезмәткәре балигъ булмаганнарга алкоголь саткан өчен штрафларның артуы турында сөйләде. Аның әйтүенчә, хәзер Административ хокук бозулар турында кодекска үзгәрешләр кертелгән: әлеге үзгәрешләр нигезендә үсмерләргә хәмер саткан өчен штрафлар ярты миллионга җитә (гражданнар өчен штраф – 30-50 мең сумга кадәр; вазыйфаи затлар, шул исәптән эшмәкәрләр өчен – 100-200 мең сумга кадәр; юридик затлар өчен – 300-500 мең сумга кадәр).

Чыгыш ясаучы киңәшмәдә катнашкан эшмәкәрләрне, әлеге хокук бозу системалы төс алган очракта сатучыга җинаять җаваплылыгы күздә тотыла, дип кисәтте.

Сатучы, сатып алучының балигълык яшенә җитүенә шикләнгән очракта,

әлеге сатып алучыдан шәхесен раслаучы документын (шул исәптән чит ил гражданинының яки Россия Федерациясендә гражданлыкка ия булмаган затның шәхесен раслаучы документ) күрсәтүне (сатып алучының яшен белү өчен) таләп итүгә хокуклы.

Моннан тыш РФ КоАПта 20.22 статья буенча –балигъ булмаганнарның исерек хәлдә җәмәгать урыннарында күренүләренә җаваплылык каралган.

Уналты яшькә кадәрге балигъ булмаган затларның исерек хәлдә урамнарда, стадионнарда, скверларда, паркларда, гомуми файдаланудагы җәмәгать транспортында, башка җәмәгать урыннарында күренүләре, шулай ук сыра һәм аның нигезендә җитештерелә торган эчемлекләр, алкогольле һәм спиртлы продукция эчүләре, табиб кушуыннан тыш, наркотик матдәләр яки психотроп матдәләр, аңны томалый торган башка матдәләр кулланулары балигъ булмаганнарның ата-аналарын яки башка законлы вәкилләрен өч йөздән биш йөз сумга кадәр административ штрафка тартуга китерә.

Шул рәвешле бүген Россия Федерациясендә үсмерләр арасында эчкечелек фәкать медицина яки хокук саклау өлкәсенең проблемасы гына булудан туктап, дәүләтнең дә “баш авыртуы”на әйләнде.