Лаеш муниципаль районында яшәүчеләрне видео-кабул итү

Бүген Татарстан Республикасы Дәүләт алкоголь инспекциясе җитәкчесе урынбасары Р.А. Арсланов гражданнар өчен чираттагы видео-кабул итү үткәрде. Бу юлы республикабызның Лаеш муниципаль районында яшәүчеләр белән “телекүпер” оештырылды.

Сорау:19 статьяның 3.2 пунктындагы 3 пунктчада болай диелгән: Мөрәҗәгать итүче алкогольле продукцияне ваклап сатуга лицензия алу өчен лицензияләүче органга мөрәҗәгать итүченең милкендә, хуҗалык алып бару, оператив идарә хокукында яки арендага алынган (срогы килешү нигезендә билгеләнеп, бер ел һәм аннан күбрәк тәшкил иткән) стационар сәүдә объектларына һәм склад бүлмәләренә ия булуын раслаучы документлар тапшыра. Нинди документлар бу?

Арсланов Р.А: Стационар сәүдә объектлары күчемсез милек объектларына керә. Аларга хокук һәм хокукның туктатылуы, РФ ГК 131 статьясы нигезендә, күчемсез милеккә һәм аның белән алыш-бирешләргә хокукларның бердәм дәүләт реестрында теркәүгә алынырга тиеш.   Шул рәвешле мөрәҗәгать итүченең милкендә, хуҗалык алып бару, оператив идарә хокукында яки арендага алынган стационар сәүдә объектларына һәм склад бүлмәләренә ия булуын раслаучы документлары булып күчемсез милеккә һәм аның белән алыш-бирешләргә хокукларны дәүләт теркәвенә алу турында таныклыклар, аларның күчермәләре (хокукларны дәүләт теркәвенә алуны хәл итүче орган яки лицензияләүче орган раслаган (төп нөсхәсен күрсәтергә кирәк) яисә нотариуста расланган) тора.

РФ ГК 651 статьясының 2 өлеше нигезендә, бер елга һәм аннан күбрәккә төзелгән бина яки корылманы арендага алу килешүе дәүләт теркәвенә алынырга тиеш, һәм теркәүгә алынгач кына килешү төзелгән булып санала. №122-ФЗ Федераль законның 14 статьясындагы 1 пункты нигезендә, килешүләрне һәм башка алыш-бирешләрне дәүләт теркәвенә алу алыш-биреш документында махсус теркәү язуын урнаштыру юлы белән раслана. Шул рәвешле мөрәҗәгать итүчеләр арендага алынган (срогы килешү нигезендә билгеләнеп, бер ел һәм аннан күбрәк тәшкил иткән) стационар сәүдә объектларына һәм склад бүлмәләренә ия булуларын раслау өчен аренда килешүен (документларда теркәү язуы штампы сугылган) яки аның күчермәсен (хокукларны дәүләт теркәвенә алуны хәл итүче орган раслаган яки нотариуста расланган) тапшыра.

РФ ГК нигезендә, субаренда килешүләренә карата да аренда килешүләре турында кагыйдәләр кулланыла (законда яки башка хокукый актларда башкача билгеләнмәгәндә). Мөрәҗәгать итүченең стационар сәүдә объектларына һәм склад бүлмәләренә ия булуын раслау өчен лицензияләүче органга югарыда күрсәтеп үтелгән таләпләргә туры килердәй субаренда килешүләрен дә тапшырырга була.

Сорау: Оешмага лицензия бирүдән баш тартылган иде. Хәзерге вакытта баш тарту сәбәпләре юкка чыгарылды. Дәүләт алкоголь инспекциясенә кабат мөрәҗәгать итү өчен оешмага үзенең гаризасына кирәкле барлык документларны кушып бирергә кирәкме, әллә баш тарту сәбәпләренең юкка чыгарылуын раслаучы документлар да җитәме?

Арсланов Р.А. Бу очракта лицензияләүче органга түбәндәге документларны тапшырырга кирәк: 1) тиешле эшчәнлек төре алып баруга лицензия бирү турында гариза, 2) лицензия бирүдән баш тарту сәбәпләренең юкка  чыгарылуын раслаучы документлар, 3) дәүләт пошлинасын түләү турында документ.

Сорау: Авылда гомуми мәйданы 34 кв.м. булган, нык фундаментлы, су кергән павильоным бар. Шунда миңа сыра сатарга ярыймы?

Арсланов Р.А.: 171-ФЗ 6 пунктындагы 3 абзацы нигезендә, сыра һәм сыра эчемлекләрен ваклап сатучы оешмалар һәм хосусый эшмәкәрләр мондый максатлар өчен милкендә, хуҗалык алып бару, оператив идарә хокукында яки арендага алынган стационар сәүдә объектларына һәм склад бүлмәләренә, шулай ук контроль-касса техникасына ия булырга тиеш (федераль законда башкача билгеләнмәгәндә).

РФ ГК 131 статьясы нигезендә, күчемсез милеккә (стационар сәүдә объекты) хокук күчемсез милеккә һәм аның белән алыш-бирешләргә хокукларның бердәм дәүләт реестрында дәүләт теркәвенә алынырга тиеш.

Павильоныгызга хокукларыгызны билгеләүче документлар белән танышыгыз. Объектның стационар булып торуының дәлиле – милеккә хокук документы (теркәү хезмәтендә теркәүгә алынган).

Сорау: Хәзерге вакытта сыраны ваклап сатуны лицензияләү мәҗбүриме?

Арсланов Р.А.: сыра һәм сыра эчемлекләрен җитештерү һәм аның әйләнеше лицензияләнми.

Сорау: Сезгә шундыйрак сорау бирәсем килә. Авыл җирлегендә шәхси йортым бар. Ишегалдыбыздагы янкормада “разливной” сыра сату ноктасы ачасым килә. Болай эшләргә ярыймы, яраса – моның өчен нәрсәләр кирәк?

Арсланов Р.А.: 171-ФЗ нигезендә, сыраны ваклап сату стационар сәүдә объектларында гына хәл ителә. Капиталь төзелеш бүлегеннән йортыгызны (яки аның бер өлешенең) торак булмаган йорт категориясенә кертеп булу-булмавын белешегез. Сезгә торак бинаны торак булмаган бина категориясенә күчерергә кирәк. Аннан соң аны – теркәү хезмәтендә стационар сәүдә объекты буларак теркәтергә.

171-ФЗ 6 пунктының  3 абзацында, сыра һәм сыра эчемлекләрен ваклап сатучы оешмалар һәм хосусый эшмәкәрләр мондый максатлар өчен милкендә, хуҗалык алып бару, оператив идарә хокукында яки арендага алынган стационар сәүдә объектларына һәм склад бүлмәләренә, шулай ук контроль-касса техникасына ия булырга тиеш (федераль законда башкача билгеләнмәгәндә), диелгән.

Стационар сәүдә объекты: нык фундаментка утыртылган һәм инженер-техник челтәрләргә тоташтырылган, бина яки бинаның бер өлешеннән, корылма яки корылманың бер өлешеннән гыйбарәт булган сәүдә объекты ул. Ул җылылык, газ, су, канализация белән тәэмин ителгән булырга тиеш. Янәшәсендә балалар, мәгариф, медицина оешмалары, мәдәният оешмалары булмаска тиеш. “Роспотребнадзор”га сыраны ваклап сату буенча стационар сәүдә ноктасы ачу турында уведомление тапшырырга кирәк.

“Сәүдә оешмаларына һәм аларда азык-төлек чималы һәм азык продуктлары әйләнешенә карата санитария-эпидемиология таләпләре” СП 2.3.6.1066-01 белән танышыгыз. Бу документта сәүдә оешмасын урнаштыруга, бүлмәләрне су белән тәэмин итү һәм канализация, җилләтү, җылыту, яктылык белән тәэмин итүгә һәм эшләүчеләрнең хезмәт шартларына карата таләпләр һ.б күрсәтелгән.

Салым инспекциясендә эшчәнлегегезне хосусый эшмәкәр буларак теркәтегез, ОКВЭД нигезендә эшчәнлегегезнең төрен теркәтегез. Салым салу системасын сайлап алыгыз.