Легаль хәмер турында барлык мәгълүматлар Интернетта булачак

Озакламый кибеттән сатып алган аракы, коньяк яки шәрабның легаль булу-булмавын мөстәкыйль тикшерү мөмкинлегенә ия булачакбыз. Шулай ук Россиядә җитештерелгән хәмер турында барлык мәгълүматлар белән дә таныша алачакбыз.

Махсус мәгълүматлар базасы – алкогольле продукция реестры ярдәмендә мөмкин булачак бу. Әлеге реестрны Алкоголь базарын җайга салу буенча федераль хезмәт (“Росалкогольрегулирование”) алып барачак һәм үзенең сайтында урнаштырачак. Хезмәт реестрны алып бару турында, шулай ук алкогольле продукция әйләнешенең башлануы турында уведомлениеләр тапшыру тәртибе хакында Хөкүмәт карары проектын эшләгән дә инде. Әлеге реестрдан теләсә кайсы гражданин язу кертү номеры һәм датасы, алкогольне маркировкалау турында мәгълүматлар яки алкоголь төренең коды турында белә алачак. Моннан тыш анда җитештерүче-завод, эчемлекнең составы, эчемлек савытының төре һәм сыешлыгы турында мәгълүматлар булачак. Шулай ук эчемлекнең яраклылык срогы, саклау шартлары белән танышу мөмкинлеге барлыкка киләчәк. Бу мәгълүматларның барысы да реестрга махсус уведомлениеләрдән (аларны алкоголь җитештерүчеләрнең барысы да “Росалкогольрегулирование”гә җибәрергә тиеш булачак) кертеләчәк. Хезмәткә бу уведомлениеләрне алар товарны төяп җибәрергә кимендә 5 көн кала тапшырачак. Озакка сузмас өчен, уведомлениеләр электрон почта аша җибәрелеп, көчәйтелгән, квалификацияле электрон имза белән имзаланачак. Әлегә, 2013 елның 1 июленә кадәр, этил спиртын ташуны лицензиясез генә, шулай ук сыра һәм аның нигезендә эчемлекләр җитештерүне исәпләү приборларыннан башка гына хәл ителергә мөмкин булуын исегезгә төшерик. Мондый законны Дәүләт Думасы узган елның декабрь азагында кабул иткән иде.

Федераль реестрны асылда алкоголь әйләнешенә контрольлек итүнең тагын бер чарасы сыйфатында бәяләргә була, дигән фикердә Илкүләм алкоголь сәясәтен эшләү үзәге җитәкчесе Павел Шапкин. Дөрес, җитештерүчеләр болай да мәгълүматларны ЕГАИСка тапшыра анысы, ди ул. Һәм бу җәһәттән мәгълүматны кабатлау килеп чыгарга мөмкин. Шул ук вакытта алкогольнең характеристикасы белән теләсә кайсыбызның таныша алу мөмкинлеге – файдалы әйбер, дип исәпли Шапкин. Ә ЕГАИСка тапшырыла торган мәгълүматлар бөтен халыкның танышуы өчен билгеләнмәгән, дип үзенең сүзләренә аныклык кертә ул. “Тик мин барыбер дә, әйтик, әйбәт коньяк эчеп куярга теләгән теге яки бу кешенең кибеткә барганчы Интернетка кереп, кибеттә контрафактка юлыкмас өчен, яраткан эчемлегенең хәзер нинди савытта, нинди этикетка белән сатылуын ачыклап утыруына шикләнәм”,– ди эксперт. Өстәвенә алкогольне җитештерү һәм аның әйләнешенә бүгенге контрольлек схемасының бик катлаулы булуын да раслый ул. Шуңа күрә схема өзеклекләр китереп чыгара да. “Минем уйлавымча, өч контрольлек чарасы: алкогольнең төрле төрләренә минималь бәя кертү, акцизлар урынына производство куәтләренә алдан йөкләнгән салым кертү һәм ил эчендә алкоголь сатуны контрольдә тотарга тиешле дәүләт компаниясе оештыру җитәчәк”, – дигән фикердә Шапкин.

Тарас Фомченков