Илдар Халиков “Татспиртпром” ААҖ Директорлар советының чираттагы утырышын үткәрде

Кичә, 2013 елның 28 февралендә, ТР Хөкүмәт йортында Татарстан Республикасы Премьер-министры Илдар Халиков рәислегендә “Татспиртпром” ААҖ Директорлар советының чираттагы утырышы уздырылды.

Көн тәртибенә “Татспиртпром”ның 2013 елга бюджетын раслау турында, инвестицион проектларны тормышка ашыру турында, шулай ук җәмгыятьнең 2013 ел гыйнварындагы эш йомгаклары турында мәсьәләләр кертелгән иде. Директорлар советы “Татспиртпром” ААҖнең 2013 елга бюджетын тикшерде һәм раслады. Бюджетта алкогольле продукцияне җитештерү күләмнәрен һәм Татарстан Республикасыннан читтә сату күләмнәрен арттыру күздә тотылган.

Директорлар советы “Татспиртпром” ААҖ генераль директоры Гиоргий Куприяновның инвестицион программаларны тормышка ашыру турында чыгышын тыңлады һәм ирештерелгән мәгълүматларны игътибарга алды. Җитештерү куәте тәүлегенә 10 мең декалитр егәрлегендә булган Усад спирт заводының инвестицион программасы 70 процентка, ягъни 877 миллион сумга финансланган.

“Татспиртпром” ААҖ нең 2013 елның гыйнварындагы финанс-хуҗалык эшчәнлеге йомгаклары буенча түбәндәге күрсәткечләргә ирешелгән. “Татспиртпром” ААҖ спирт заводлары 203 мең декалитр күләмендә спирт җитештергән. Узган елның шушы ук чорына карата (193 мең декалитр җитештерелгән булган) 105 процент дигән сүз бу. Спирт заводлары җитештерү куәтләрен 100 процентка эшкә җигеп эшләгән. 2013 елның гыйнварында алкогольле продукция җитештерү 36 процентка артып, 434 мең декалитрга җиткән (2012 елның гыйнварында 319 мең декалитр булган). “Татспиртпром” ААҖнең алкогольле продукциясен филиаллары һәм “Алкоторг” ҖЧҖ аша сатуның гомуми күләме 326,5 мең декалитр тәшкил иткән. Узган елның шушы ук чоры белән чагыштырганда 71 процентка күбрәк бу (2012 елның гыйнварында 191,4 мең декалитр сатылган булган). 2013 елның гыйнварында сатылган продукциянең гомуми күләмендә РФдә сату өлеше 64 процент тәшкил иткән. РФдә сату күләмнәре узган елның шушы ук чорындагы күрсәткечтән 4 тапкырдан күбрәккә арткан һәм ул 213 мең декалитр тәшкил иткән.

Хисап чорында сәнәгатьтә җитештерү индексы 129 процент тәшкил иткән. Хезмәт җитештерүчәнлеге бер кешегә акчага салып исәпләгәндә 236 мең сум тәшкил иткән, узган елдагы белән чагыштырганда 34 процентка арткан дигән сүз бу.

“Татспиртпром” ААҖ 2013 елның гыйнварында барлык дәрәҗәләрдәге бюджетларга 1 295,6 миллион сум күләмендә салымнар һәм җыемнар күчергән, шул исәптән акциз 80 процентын тәшкил иткән – 1 042,4 миллион сум. Барлык дәрәҗәләрдәге бюджетларга акча күчерүләрнең үсеш темпы 2012 елдагы шундый ук күрсәткечләргә карата 222 процент тәшкил иткән.

2013 елның гыйнварында ТР тупланма бюджетына 443 миллион сум акча кертелгән, шуннан акцизлар күләме – 419 миллион сум.

Утырыш йомгаклары буенча “Татспиртпром” ААҖ Директорлар советы җәмгыятьнең хисап чорындагы финанс-хуҗалык эшчәнлеген югары бәяләде.