Сатмавың – бер бәла, ә сатуың –мең бәла

Агымдагы елның гыйнварында ТР Дәүләт алкоголь инспекциясенең Зеленодол территориаль органы белгечләре Россия Эчке эшләр министрлыгының Зеленодол районы буенча ОПДН бүлеге хезмәткәрләре белән берлектә балигъ булмаган затларга алкоголь һәм тәмәке сатуны кисәтү буенча кайбер рейдлар үткәрде.

Рейдлар барышында балигъ булмаган затларга сыра саткан өчен 2 беркетмә, тәмәке саткан өчен – 5 беркетмә төзелде.

2012 елда шундый уртак рейдлар барышында административ хокук бозулар турында 92 беркетмә тутырылды. Шулардан 57 се балигъ булмаган затларга спиртлы эчемлекләр һәм тәмәке сатуны тыюны санга сукмаган сатучыларга, 31 е – тәмәке саткан өчен, 5 беркетмә сыра һәм тәмәке саткан өчен тутырылды.

РФ территориясендә балигъ булмаган затларга алкогольле продукцияне ваклап сатуны тыйган закон инде күптәннән гамәлдә булып килә. Тик аны бозган өчен күздә тотылган закон, яшьләре һәм документлары белән кызыксынмыйча гына, үсмерләргә спиртлы эчемлекләр саткан сатучыларны әлләни куркытмый. Зур челтәр кибетләрендә үсмергә сыра сату авыррак анысы, ә менә кечкенә кибетләр һәм палаткаларда сатучылар, янәсе, вакчылланып, үсмернең ничә яшьтә булуы белән кызыксынуны кирәк дип тапмый. Сатучылар, карап торышка 18 яшьтән ким биреп булмаган кешене кире борып булмый бит, дип кенә җибәрә.

2012 елның ноябреннән РФ КоАПка үзгәрешләр кертелүен искә төшерик. Әлеге үзгәрешләр нигезендә балигъ булмаган затка алкогольле продукцияне ваклап саткан өчен административ штраф 10 тапкырга арттырылды һәм хәзер ул тәшкил итә:

–гражданнарга – 30дан 50 мең сумга кадәр (элек 3 тән 5 мең сумга кадәр иде);

– вазыйфаи затларга – 100 дән 200 мең сумга кадәр (элек 10нан 20 мең сумга кадәр иде):

– юридик затларга – 300 дән 500 мең сумга кадәр (элек 80 нән 100 мең сумга кадәр иде).

Хәзерге вакытта балигъ булмаган затка сыра саткан сатучыны штраф рәвешендә административ җаваплылыкка тарту очраклары бар да инде.