Легаль булмаган хәмер сатуның яңа очраклары

Татарстан Республикасы Дәүләт алкоголь инспекциясенең Әлмәт территориаль органы хезмәткәрләре март башларында Татарстан буенча Эчке эшләр министрлыгының Әлмәт районы бүлеге хезмәткәрләре белән берлектәге төнге рейд барышында “Продукты” (адресы: Әлмәт ш, Базовая ур., 8, хосусый эшмәкәр В.Х.Раупова) кибетендә легаль булмаган продукция, тәгаенләп әйткәндә, Казахстан Республикасының Актүбә шәһәрендә “Мaximus” җаваплылыгы чикләнгән җәмгыяте җитештергән “Кристалл” аракысын сату очрагы ачыкланды. Тикшерүчеләргә Татарстан Республикасы территориясенә кертелгәндә сыйфаты тикшерелмәгән, димәк, легаль булмаган продукциянең сатуга чыгарылуын билгеләү авыр булмады. Шешәләрдә продукцияне тутыру датасы турында мәгълүмат юк, продукция билгеләнгән үрнәктәге маркалар белән маркировкаланмаган, шулай ук партиянең теркәү номеры күрсәтелгән стикерлары юк. Моннан тыш хосусый эшмәкәрнең товар-транспорт накладнойларына ия булмавы да билгеләнде. Кирәкле барлык документлар рәсмиләштерелгәннән соң тартып алынган алкоголь Татарстан Республикасы буенча Эчке эшләр министрлыгының Эксперт-криминалистика үзәгенә җибәрелде. Үткәрелгән тикшеренүләр барышында әлеге аракыда агулы матдә – ацетон барлыгы ачыкланды. Составында ацетон матдәсе булу продукциянең аракы җитештерү өчен яраксыз булган, ягъни азык спирты булмаган спирттан җитештерелүе турында сөйли. Әлеге этил спирты РФ Хөкүмәтенең 29.12.2007 ел, №964 карары нигезендә, Агулы матдәләр исемлегенә кертелгән. Димәк, бу аракы кулланучыларның гомере һәм сәламәтлегенең иминлеге таләпләренә туры килми. Әлеге очрак буенча административ тикшерү алып барыла.

Алкогольне легаль булмаган сатуның тагын бер очрагы 2013 елның 20 мартында “Луна” кафесында ( адресы: Бөгелмә ш., Вокзал яны мәйданы, хосусый эшмәкәр Алескеров Рәмиз Микаил улы) билгеләнгән иде. Бу кафеда “Добрая”, “Графф Ледофф”, “Тундра” аракыларының лицензиясез һәм товар-транспорт накладнойлары булмаган килеш сатылуы билгеләнде. Моннан тыш кафе бүлмәләрен тикшерү барышында 1,5 л күләмендәге пластик шешәләргә тутырылган Казахстан Республикасында җитештерелгән “Цезарь” коньягы табылды. Казахстан Республикасының әлеге продукциясенең дә билгеләнгән үрнәктәге маркалар белән маркировкаланмаган булуы, шулай ук партиясенең теркәү номеры күрсәтелгән стикерлары булмавы ачыкланды.

Тартып алынган барлык продукция, эксперт тикшеренүләре уздыру өчен, Татарстан Республикасы буенча Эчке эшләр министрлыгының Эксперт-криминалистика үзәгенә җибәрелде.

Исегезгә төшерәбез: Казахстан Республикасында җитештерелгән алкогольле продукция узган елның азагында сатуда пәйда булды. Нәкъ менә шул чакта Татарстан Республикасы Дәүләт алкоголь инспекциясе хезмәткәрләре көньяк-көнчыгыш чик районнарында (Азнакай, Баулы, Ютазы) очсыз бәядән (аракы: 100дән 150 сумга кадәр, коньяк – 200 сумнан алып, шул ук вакытта аракының күпләп сату бәясе – 60 сумнан алып, коньякныкы – 120 сумнан алып) халыкка Казахстан Республикасында җитештерелгән аракы һәм коньяк сату очракларын ачыклады.

Контрольлек-инспекция чаралары барышында мондый продукциянең кечкенә партияләр белән, федераль трассаларны читләтеп, Оренбург өлкәсе һәм Башкортстан Республикасы юллары аша “Газель” кебек машиналарда китерелүе һәм машинадан гына яки таксистлар аша, юл буендагы вак-төяк җәмәгать туклануы объектлары аша сатылуы мәгълүм булды.

Казахстанның алкоголь продукциясе республика территориясендә легаль булмаган рәвештә сатылу гына түгел, ялган продукция дә булып тора: буяулар һәм ароматизаторлар өстәлгән су-спирт эремәсе коньяк дип сатыла.