Хокукларыңны белеп тор

“Республика Татарстан” газетасы һәм ТР Дәүләт алкоголь инспекциясе игълан иткән “Кулланучы хокуклары” конкурсына йомгак ясалды. Бәйгедә катнашучылар “РТ” да һәм Дәүләт алкоголь инспекциясе сайтында басылган тугыз сорауга (тормыштагы хәлләрдән алынган) җавап биреп, үзләренең хокукый белемнәрен күрсәтте.

Җиңүчеләрне – Александр Музеев, Шерафкан Бадалов һәм Ярослав Самсоновны бүләкләү 15 март – Бөтендөнья кулланучылар хокукларын яклау көнендә уздырылды. ТР Дәүләт алкоголь инспекциясе җитәкчесе Игорь Марченко аларга ведомствоның мактау грамоталарын һәм призлар тапшырды, ә “РТ” конкурсантларны газетага яздыру, фирма футболкалары һәм бейсболкалар белән бүләкләде. Беренче урынны яулаган Александр Музеев (ТР Экология һәм табигый байлыклар министрлыгының өлкән белгече) бәйге сорауларының үзенә бик четерекле тоелганлыгын таныды. Кайберләренә җавап табу өчен законнарны хәтерендә яңартырга, аларны тормышта куллану тәҗрибәсен барларга туры килүен искәртте. Конкурсант ниндидер бер этапта хәтта барысын да ташларга теләвен, әмма барыбер эшне азакка хәтле җиткерергә үзендә көч табуын яшермәде.

КНИТУ (КАИ) студенты Ярослав Самсонов өченче урынны алды. Баксаң, Ярослав кулланучылар хокукларын яклау өлкәсендәге мөнәсәбәтләрне хокукый җайга салу белән теоретик яктан гына шөгыльләнеп калмыйча, кулланучылар хокукларын яклау турында законны куллану тәҗрибәсенә дә ия икән инде. Аңа судта үзенең кулланучы буларак хокукын ике тапкыр якларга туры килгән. Егет икесендә дә җиңгән.