Бөтен дөнья белән якыннар турында кайгырту
Халыкара инвалидлар көне (International Day of Disabled Persons) 1992 елның 14 октябрендә Берләшкән Милләтләр Оешмасы Генераль Ассамблеясе тарафыннан игълан ителгән һәм ел саен 3 декабрьдә билгеләп үтелә. Ассамблея дәүләтләрне - БМО әгъзаларын бу көнне инвалидларның җәмгыять тормышына интеграцияләнүенә юнәлдерелгән чаралар үткәрергә чакырды. Әмма бер көн белән генә чикләнмәс өчен ел саен 1-10 декабрь көннәрендә инвалидлар декадасы үткәрелә.
Проблемаларга игътибар җәлеп итү өчен, бөтен Татарстан буенча бу көннәрдә төрле чаралар планлаштырылган. Татарстан Республикасы Дәүләт алкоголь инспекциясенең Яшел Үзән территориаль органы Буа, Тәтеш, Кама Тамагы, Апас, Яшел Үзән, Югары Ослан, Чүпрәле, Кайбыч районнарында семинарлар, түгәрәк өстәлләр һәм инвалидлар өчен тернәкләндерү үзәкләрендә, картлар һәм инвалидлар өчен интернатларда кулланучылар хокукларын яклау өлкәсендә аң-белемнәрен арттыру буенча уку дәресләре үткәрде. Шулай ук Татарстан Республикасы Дәүләт алкоголь инспекциясе хезмәткәрләре район мәктәпләре укучылары белән дә аралашты.
ТР Хезмәт, халыкны эш белән тәэмин итү һәм социаль яклау министрлыгының Тәтеш муниципаль районындагы «Тәтеш балкышы «Халыкка социаль хезмәт күрсәтү комплекслы үзәге» дәүләт автоном социаль хезмәт күрсәтү учреждениесендә Татарстан Республикасы Дәүләт алкоголь инспекциясенең Яшел Үзән территориаль органы контроль-инспекция бүлегенең әйдәп баручы белгеч-эксперты Елена Сазонова кулланучылар хокукларын яклау өлкәсендә халыкка мәгълүмат бирү буенча консультация өстәле үткәрде. «Барс» СОК базасында мөмкинлекләре чикле балалар һәм социаль куркыныч хәлдә булган балалар өчен «Спортчы һәм активлар» дигән чара узды.
Халыкка сәүдә кагыйдәләре, «Кулланучылар хокукларын яклау турында» Россия Федерациясе Законының аерым статьялары, гражданнарның мөрәҗәгатьләрен карау тәртибе аңлатылды. Барлыкка килгән конфликтларны һәм проблемаларны хәл итү буенча киңәшләр бирелде. Сыйфатсыз товарлар сатып алган очракта сатучыга дәгъва белдерү сроклары, шулай ук аларны сатучыга кире кайтару тәртибе каралды.
Чара кулланучылар хокукларын яклауның төрле мәсьәләләре буенча буклетлар тарату белән барды, шулай ук элемтә өчен телефоннар күрсәтелгән визиткалар өләшенде.