ТР Дәүләт алкоголь инспекциясе җитәкчесе укучыларны һәм укытучыларны Белем көне белән котлады
Бүген Татарстан Республикасы Дәүләт алкоголь инспекциясе җитәкчесе Җәүдәт Әхмәтханов Казан шәһәренең 64нче гомуми белем бирү мәктәбендә булды. Ул укучыларны, укытучыларны һәм ата – аналарны иң матур бәйрәмнәрнең берсе - дулкынландыргыч өметләр һәм истәлекләр белән тулы Белем көне белән котлады.
– Татарстанда белем алу - илдә иң яхшыларның берсе. Әлбәттә, монда төп урынны безнең педагоглар: мәктәп укытучылары, урта һөнәри һәм югары уку йортлары укытучылары, мәктәпкәчә оешмалар һәм өстәмә белем бирү учреждениеләре тәрбиячеләре били. Республикада 80 меңгә якын остаз белемнәрен тапшырып кына калмыйча, Россиянең лаеклы гражданнарын да тәрбияли, - диде Җәүдәт Әхмәтханов сәламләү сүзендә.
64 нче урта гомуми белем бирү мәктәбе белем бирү платформасын тәэмин итә, анда 500 дән артык бала үз потенциалын күрсәтә, яңа белемнәр ала.
Җәүдәт Йосыф улы Татарстан Республикасы Рәисе исеменнән хәер-фатиха сүзләрен җиткерде:
- Республика җитәкчелеге киләчәктә дә мәгариф оешмаларын модернизацияләү һәм заманча җиһазлау, иң яхшы инновацион технологияләрне һәм иң сыйфатлы белем бирү программаларын гамәлгә кертү, перспектив проектларга ярдәм итү һәм уку йортларын предприятиеләр белән интеграцияләү өчен барлык кирәкле шартларны тудырачак. Татарстанда фәнни-технологик үсеш елы чаралары моңа сизелерлек этәргеч бирәчәк.
Бу көн беренче кыңгырау белән ачышлар һәм иҗади казанышлар дөньясына ишекләрен ачачак беренче сыйныф укучылары өчен үзенчәлекле һәм истә калырлык бәйрәм. Педагоглар коллективы һәм ата-аналар нәни укучыларның ышанычлы дуслар табачагына, кыйммәтле белем алачагына, ә мәктәп алар өчен чын-чынлап туган мәктәбе булачагына ышаналар.