Кулланучы, үз хокукларыңны яклый бел!
Бөтендөнья кулланучылар хокукларын яклау көненә багышланган чаралар кысаларында, Татарстан Республикасы Дәүләт алкоголь инспекциясенең Әгерҗе районы буенча Яр Чаллы территориаль органы хезмәткәре Лилия Гуляева һәм сыйныф җитәкчесе Эльвира Гыйләҗева Т. Гыйззәт исемендәге 3 номерлы мәктәпнең 8 сыйныф укучылары белән «Үз хокукларыңны яклый бел» дигән темага сыныф сәгате оештырды.
Очрашу башында балаларны РФнең «Кулланучылар хокукларын яклау турында»гы Законы белән таныштырдылар. Аннары сатып алучыларга нәрсә белергә һәм теге яки бу ситуациядә үзләрен ничек тотарга, товарны сайлаганда нәрсәгә игътибар итәргә кирәклеген һәм кулланучының хокуклары бозылган очракта кемгә ярдәм сорап мөрәҗәгать итәргә мөмкин булуын сөйләделәр.
Укучылар алган белемнәрен яхшырак үзләштерсеннәр һәм ныгытсыннар өчен, карточка викторинасы үткәрелде: укучылар төрле ситуация карточкаларыннан бурычлар билгеләделәр, үзләрен кулланучы урынына куйдылар, төрле ситуацияләрдән чыгу вариантларын тәкъдим иттеләр.
Класс җитәкчесе читтә калмады һәм әлеге викторинага кушылды.
Чара азагында укучылар тормыш хәлләрен һәм мисалларн карадылар:
- бу очракта кем кулланучы булып тора?;
- әлеге очрак кулланучылар хокукларын яклауны регламентлый торган законнарга эләгәме?;
- барлыкка килгән вәзгыятьтән ничек чыгарга мөмкин?
Чара ахырында һәркемгә тематик буклетлар бирелде.