«Джанкой» кушаматлы Герой юлы
Бүген Татарстан Республикасы Дәүләт алкоголь инспекциясенең Әлмәт территориаль органы башлыгы Миләүшә Михееваның энесе Марат Марсель улы Хуббатов тарихын сөйләрбез. Марат Хуббатов 1989 елның 10 февралендә Әлмәттә туган. 13 нче урта мәктәпне тәмамлагач, ул Ерак Көнчыгышта матрос булып хезмәт итә. Армиядән кайткач, Марат Әлмәт районының наркотиклар әйләнешенә каршы көрәш бүлегендә машина йөртүче булып эшли, гаилә кора, ике баласы бар.
Өлешчә мобилизация игълан ителгәннән соң, махсус хәрби операция башлануга бәйле рәвештә, ул 6 айга контракт буенча «Вагнер» шәхси хәрби компаниясе сафларына керергә карар кабул итә.
2022 елның 18 сентябреннән Марат хәрби хәрәкәтләрдә катнаша, алдан хәрби өйрәнүләр узып, Луганск Халык Республикасына командировкага җибәрелә. Анда, штурм группасы командиры сыйфатында, азат итү операцияләрендә, шул исәптән Угледар, Соледар һәм Артемовск (Бахмут) өчен сугышларда катнаша. Артемовск өчен сугыш барышында ул контузия ала һәм Ростов-Дон госпиталенә дәваланырга озатыла. Шуннан соң аны алга таба тернәкләнүгә өенә кайтарып җибәрәләр.
Дуслары һәм командование белән элемтәсен өзми, ул һәрвакыт фронтка кайтырга хыяллана иде. 2023 елның августында Марат контрактны бер елга озайтты һәм 8 сентябрьдә Херсон өлкәсенә махсус хәрби операция зонасына китте. Аның сугышчан тәҗрибәсен исәпкә алып, 73612 нче өлештә аны инструктор итеп билгелиләр. Маратка яшь сугышчыларны үзе белгән күнекмәләргә өйрәтү йөкләнә.
Чираттагы бурычны үтәгәннән соң, Марат группасы, терәк пунктына кайтып барганда, ут астына эләгә. Марат авыр контузия ала, аягына җитди җәрәхәт ала, бу ашыгыч эвакуация таләп итә. Башта аны Теплое бистәсендәге госпитальгә илтәләр, ә аннары махсус поезд белән Казанның хәрби госпиталенә күчерәләр. Табибларның тырышлыгына карамастан, авыр җәрәхәтләр һәм контузия үлемгә китерә. Озак көрәшкәннән соң, 2024 елның 8 апрелендә Марат госпитальдә вафат була.
Күрсәткән батырлыгы һәм хәрби бурычларны уңышлы үтәгәне өчен Хуббатов Марат Марселевич «Батырлык өчен» медале, ЧВК «Вагнер» бүләкләре һәм Луганск Халык Республикасы Башлыгының Рәхмәт хаты белән бүләкләнде. Аның исеме мәңгегә хәтеребездә калачак. Ул кыска, ләкин лаеклы гомер кичерде, һәм аның турында истәлек мәңге яшәячәк.