Кулланучыга микродулкынлы мичтә җитешсезлек ачыкланганда эш итү тәртибен аңлаттылар
Консультация өстәле үткәрү барышында Татарстан Республикасы Дәүләт алкоголь инспекциясенең Чистай территориаль органы белгеченә шәһәрдә яшәүче хатын-кыз, сатучының гарантия срогы дәвамында сафтан чыккан товарны алмаштыру турындагы таләбен үтәүдән баш тартуына шикаять белән мөрәҗәгать итте.
2024 елның декабрендә хатын-кыз кибеттән 9049 сумлык микродулкынлы мич сатып алган. Товарга гарантия срогы 12 ай тәшкил итә. Әмма агымдагы елның май ахырында мич эшләүдән туктый. Товарда җитешсезлекләр гарантия срогы дәвамында барлыкка килгәч, сатып алучы тиешле сыйфатта булмаган товар өчен акчаны кире кайтаруны таләп иткән. Сатучы кулланучының таләбен үтәүдән баш тарткан, моны ул товарның техник яктан катлаулы булуы һәм сатып алганнан соң 15 көнлек срок узгач, шартнамәне өзү товарның сизелерлек җитешсезлеге ачыкланган очракта, кимчелекләрне бетерү срокларын бозган очракта яки товарны гарантияле срокның һәр елы дәвамында, берничә тапкыр бетерү нәтиҗәсендә, утыз көннән артык файдалану мөмкин булмаган очракта гына мөмкин булуы белән аңлата.
Әмма гамәлдәге законнар нигезендә, гади микродулкынлы мичләр, урнаштырыла торган микродулкынлы мичләрдән аермалы буларак, техник яктан катлаулы товарлар исемлегенә керми. Шуңа бәйле рәвештә, микродулкынлы мичтә җитешсезлекләр гарантия срогы дәвамында ачыкланганда, әгәр алар сатучы тарафыннан килештерелмәгән булса, кулланучы теләсә нинди таләп, шул исәптән килешүне өзүне дә белдерергә хокуклы.
Шулай итеп, сатучының гамәлләрендә тиешле законнарны бозу билгеләре күренә. Кулланучыга сатучыга карта язма дәгъва юлларга тәкъдим ителгән. Аның таләпләре ирекле рәвештә үтәлмәгән очракта, кулланучы үз хокукларын яклауны сорап судка мөрәҗәгать итәргә хокуклы. Чистай территориаль органы белгечләре кирәк булганда, үз вәкаләтләре чикләрендә, хокукый ярдәм күрсәтәчәкләр.