Бөек Җиңүнең 80 еллыгына багышлана
Вәлиев Габдулла Габидулла улы - Татарстан Республикасы Дәүләт алкоголь инспекциясенең Чистай территориаль органы шоферы Айрат Зариповның бабасы. Ул 1925 елның 10 гыйнварында Татарстан АССРның Чистай районы Татар Сарсазы авылында туа.
1942 елның ахырында Кызыл Армиягә алына. Яшь сугышчы курсын үтеп, хәрби ант кабул итеп, Карелия фронтында 100 нче гвардия Свирск укчы дивизиясендә сугыша. Сугышта катнашуының беренче көннәреннән үк үзен кыю һәм батыр сугышчы итеп күрсәтә. Беренче «Батырлык өчен» медален сапер Вәлиев 1944 елның 1 июлендә ала. 1944 елның 22 июненнән 20 июленә кадәр барган һөҗүм вакытында Габдулла танкка һәм пехотага каршы 58 минаны арындыра һәм зарарсызландыра. Укчы дивизия Төньякның катлаулы шартларында, урманлы-сазлы урында Карелия буйлап хәрәкәт итә. Карелияне басып алучылардан азат иткән өчен Габдулла Вәлиев тагын бер медальгә лаек була. Европа территориясендә Венгрия, Чехословакиядә сугышларда катнаша, Венаны азат итә. Җиңү көнен Прага янында каршылый. Кораллы Көчләрдә аның хезмәте 1949 елга кадәр дәвам итә. Туган ягына кайткач, техник белем ала, коммунист була, Чистай АТПда, аннары электр челтәрләрендә транспорт бүлегендә мастер булып эшли. Производство алдынгысы буларак, ул «В.И. Ленинның тууына 100 ел тулу уңаеннан Фидакарь хезмәте өчен» медале белән бүләкләнә.
Лаеклы ялда ул күп вакытын гаиләсенә багышлый, йорт яны участогы белән шөгыльләнгән, балалары, оныклары һәм оныкчыклары өчен үрнәк булган. Ул 2000 елда вафат булды, гаилә якын кешесен һәм остазын югалтты, ә без тагын бер сугыш ветераныннан мәхрүм калдык.