Бөек Җиңүнең 80 еллыгына багышлана
Бу язма бабам Капитонов Иван Павловичка багышлана (туган еллары: 1911-1990).
Ул Аксубай районының Иске Үзи авылында туа. 1941 елда Татарстан АССРның Аксубай РВКсы тарафыннан фронтка алына. Хатыны һәм өч кечкенә баласын калдырып, сугышка китә.
Иван ярлы гаиләдән иде. Аның бабасы - Дмитрий Капитонов рекрут булган һәм 25 ел патша армиясендә хезмәт иткән.
Иван Капитонов үзенең хәрби юлын өлкән сержант дәрәҗәсендә отделение командиры булып башлады, ә аннары аны инде старшина дәрәҗәсендә Беренче Балтыйк буе фронтының 4 нче удар армиясенең 35 нче армия киртә отрядының 2 нче укчы ротасы взводы командиры ярдәмчесе булып дәвам итте. Күп тапкырлар яраланган. Сугыш беткәч, 1945 елның көз ахырында авылына кайта. Сугыштан соң бабайның тагын өч баласы туа. Шуларның берсе минем әти.
1944 елның 5 декабрендә Капитонов Иван Павлович төнлә дошман ягына үтеп кереп, берүзе немец обер-ефрейторын әсир иткәне өчен «Батырлык өчен» медале белән бүләкләнде. Шулай ук 1944 елда «Сугышчан казанышлары өчен» медале, 1945 елда «1941-1945 еллардагы Бөек Ватан сугышында Германияне Җиңгән өчен» медале, 1985 елда I дәрәҗә Ватан сугышы ордены белән бүләкләнә.
Без барыбыз да бабабыз белән бик горурланабыз! Аның тормышы һәм батырлыклары турындагы истәлекләр аның киләчәк буыннарының йөрәкләрендә мәңге яшәячәк!
Татарстан Республикасы Дәүләт алкоголь инспекциясенең Әлмәт территориаль органы контроль-инспекция бүлегенең әйдәп баручы белгеч-эксперты Степанова Лилия Васильевна.