Атна йомгаклары

Узган атнада Чаллы территориаль органы белгечләренә бик зур киеренкелек белән эшләргә туры килде. Татарстан Республикасы Хөкүмәте порталының “Халык контроле” бүлегенә алынган шикаятьләр каралды, алкогольле һәм спиртлы продукциянең законсыз әйләнеше очраклары ачыкланды, шулай ук эчке эшләр органнары хезмәткәрләре белән уртак рейдлар уздырылды. 26 май көнне мэриядә үткәрелгән “Эшлекле дүшәмбе”дә Татарстан Республикасы Дәүләт алкоголь инспекциясенең Чаллы территориаль органы начальнигы Г.Т.Вафина алкогольле продукциянең законсыз әйләнеше өлкәсендә башкарылган эшләр буенча узган атнага йомгак ясап үтте. “19-23 май көннәрендә территориаль орган белгечләре закон бозуның 17 очрагын ачыклады. Тәгаенләп әйткәндә, тиешле лицензиядән башка гына хәмер продукциясе сатуның 4 очрагы, сыраны билгеләнмәгән вакытта сатуның 9 очрагы, көмешкә сатуның 2 очрагы (Алабуга районы, Мамадыш ш.), стационар булмаган сәүдә объектында сыра сатуның бер очрагы һәм Казахстан Республикасында җитештерелгән алкогольле продукцияне китерүнең бер очрагы билгеле булды,” - диде ул. Барлыгы 119,2 литр күләмендә алкогольле продукция законсыз әйләнештән алынды.