2014 елның 27 ноябрендә “Кулланучылар хокукларын яклау” темасы буенча 2014 елгы олимпиаданың абсолют җиңүчесен бүләкләү була
2014 елның 27 ноябрендә “Кулланучылар хокукларын яклау” темасы буенча 2014 елгы олимпиаданың абсолют җиңүчесен бүләкләү була. Бүләкләү тантанасы Казан шәһәренең 7 нче гимназиясендә үткәрелә.
Республикабызда “2014-2020 елларга Татарстан Республикасында кулланучылар хокукларын яклауны комплекслы үстерү” программасын тормышка ашыру кысаларында менә инде икенче ел рәттән “Кулланучылар хокукларын яклау” дигән тема буенча олимпиада уздырылды.
Быел Татарстан Республикасы мәктәпләрендәге 9-11 сыйныфларда белем алучы 676 укучы заявкалар тапшырган булса, шуларның 37се генә йомгаклау этабын күрү бәхетенә иреште. 5 ноябрь көнне Түбән Кама шәһәрендә олимпиаданың зона йомгаклау этабы уздырылып, аның барышында республиканың Кама аръягы зонасы шәһәрләре һәм районнарыннан олимпиадада катнашкан “иң-иңнәр” ачыкланган иде. 7 ноябрьдә исә Казанда шундый ук бәйге үткәрелде. Быел олимпиадада катнашучыларга катлаулырак биремнәр тәкъдим ителде. Олимпиадада катнашкан егет-кызларның саны арту (2013 елда укучылардан 511 заявка алынган иде) әлеге тема белән кызыксынуның көчәюе, үсеп килүче буынның активлашуы турында сөйли. Шул ук вакытта укучыларның белем дәрәҗәсе үсү дә сөендерә.