Көмешкә сатучылар азды
Февраль аенда ТР Дәүләт алкоголь инспекциясенең Арча территориаль органы белгечләре ТР буенча Эчке эшләр министрлыгы бүлекләре хезмәткәрләре белән берлектә шәхси хуҗалыкларда көмешкә сатуның 4 очрагын ачыклады
2015 елның 4 февралендә үткәрелгән оператив чаралар барышында Арча районының Түбән Кенәр авылында гражданка С.ның үз йортыннан 300 сумга 2 шешә спиртлы сыекча сатып җибәрүе ачыкланды. Шуннан соң ханым тикшерүчеләргә тагын 5 л спиртлы сыекчасын чыгарып бирергә мәҗбүр булды.
6 февраль көнне Әтнә авылында гражданка М.ның һәм Борнак авылыннан (Балтач районы) гражданка Х.ның үз йортларыннан спиртлы сыекча сатып җибәрүләре билгеләнде. Болары да тикшерүчеләргә 5 литрга якын су кушылган спиртларын яшереп куйган урыннарыннан чыгарып бирде.
2015 елның 5 февралендә Саба районының Кече Шынар авылында гражданка З. контроль сатып алу барышында шәхси йортыннан ярты литр көмешкә сатып “янды”.
Барлык фактлар буенча административ тикшерүләр үткәрелә.