Ташучыларны тотканнар
ЮХИДИ хезмәткәрләре “Зеленодол” машина авырлыгын үлчәү пунктында ВАЗ 11183 автомобилен тикшергән. Машина рулендә Югары Осланда яшәүче бер ханым утырган булган. Автомобиль эчендәге биш литрлы 4 канистрда хәмер исе килеп торган үтә күренмәле сыекча тутырылганлыгы билгеләнгән. Машина йөртүче ханым әйтүенчә, хәмерне (аракы) ул бер танышы - “дальнобойщик”тан 9000 сумга сатып алган.
Моннан тыш ЮХИДИ хезмәткәрләренә Йошкар-Ола – Зеленодол автомобиль юлының 120 нче чакрымында «Форд Транзит» машинасын туктатырга туры килгән. Бу юлы Мәскәүдә яшәүче бер ир-ат хәмер исе килеп торган сыекча тутырылган унар литрлы - 6 һәм бишәр литрлы 3 пластик шешәсе белән “кармак”ка эләккән. Хәмерне ул, янәсе, Мәскәүдә ял көне базарында сатып алган. Яңа елны туган-тумачалары, дус-ишләре белән бергә каршылау өчен, Апас районының Багыш авылына кайтышы икән, имеш.
Татарстан Республикасы Дәүләт алкоголь инспекциясенең Зеленодол территориаль органы вазыйфаи затлары әлеге фактлар буенча административ тикшерүләр үткәрә.