Әлмәтнең азык-төлек кибетендә 180 савыттан артыграк “фанфурик” сатудан алынды
Әлмәттә “ике төрле максаттагы” продукция сатуны ачыклау буенча рейдның чираттагысы үткәрелде. Шәһәрдә яшәүче бер кешенең шикаяте буенча азык-төлек кибетләренең берсенә планнан тыш тикшерү үткәрелде. Биредә Дәүләт алкоголь инспекциясе хезмәткәрләре косметика лосьоннары сатылуын ачыклады. #АльметьевскТВ телекомпаниясе журналистлары бу хакта сюжет әзерләде.
Россиядә сыйфатсыз хәмердән бик күпләр җан тәслим кыла. Барыннан да элек “ике төрле максаттагы” спиртлы продукция: дару төнәтмәләре, парфюмерия-косметика, көнкүреш химиясе продукциясе кулланудан кешеләрнең гомере өзелә. Моның ише продукция тутырылган кечкенә генә савытлар халык телендә “фанфуриклар” дип йөртелә. Соңгы вакытларда азык-төлек кибетләрендә косметика лосьоннарын сату очраклары ешайды. Дәүләт алкоголь инспекциясе белгечләре рейд барышында Төзүчеләр проспектындагы тәүлек әйләнәсендә эшләүче кибеттә “фанфурикларның” ике төре - «Березовые почки» һәм «Чистый снег» лосьоннары (барлыгы 181 савыт) сатылуын ачыклады. Бу продукциянең барысы да сатудан алынып, экспертизага җибәрелде. Тикшеренү бәяләмәсе буенча административ хокук бозу турында беркетмә төзеләчәк.
- Әлеге материалны полиция хезмәткәрләре рәсмиләштерде. Соңыннан ул Дәүләт алкоголь инспекциясенең Әлмәт территориаль органына җибәреләчәк. Без исә административ хокук бозу турында эш кузгатып, әлеге спиртлы продукциягә экспертиза үткәрәчәкбез, - ди ТР Дәүләт алкоголь инспекциясенең Әлмәт территориаль органы контрольлек-инспекция бүлеге консультанты Оксана Крамар.
Дәүләт алкоголь инспекциясе хезмәткәрләре, косметика лосьоннарын, шулай ук дару төнәтмәләрен дә, азык-төлек продуктлары булып тормаганлыктан, эчү максатында кулланырга ярамый, дип кисәтә. Аларны бу максатта куллану бик аянычлы төгәлләнергә мөмкин. Алкогольле продукцияне законсыз җитештерү яки сату фактлары турында 22-21-66 телефоны аша хәбәр итәргә була. Сезнең хәбәр кемнәрнеңдер гомерен саклап калырга мөмкин.