Мәктәп яны лагеренда җәй файдалы үтә!
23 июнь көнне Татарстан Республикасы Дәүләт алкоголь инспекциясенең Чаллы территориаль органы эчке базарны үстерү һәм координацияләү бүлеге хезмәткәрләре Чаллы шәһәренең 10 нчы мәктәбендә балаларга куллану базары өлкәсенә кагылышлы аң-белемнәр эстәү өчен уен рәвешендә очрашу үткәрде. Чарада 7дән 10 яшькә кадәрге балалар катнашты.
“Кулланучы – кем ул?” дигән сорауга җавап бирү, “сыйфатсыз товар”, “товарның яраклылык срогы” дигән төшенчәләрне, “Кулланучылар хокукларын яклау турында” 07.02.1992 ел, № 2300-1 РФ Законын балаларга аңлату үткәрелгән чараның төп максатына әйләнде.
Сәүдә объектларында әледән-әле чыгып торган теге яки бу хәлләрне уен рәвешендә аңлату сабыйларга яңа белемнәрен тирәнрәк үзләштеререгә ярдәм итте.
“Бик тә файдалы очрашу үткәрелде! - дип йомгак ясады үткәрелгән чарага мәктәп яны лагере директоры. - Гади телдә, уеннар, видеороликлар аша ирештерелгән мәгълүматлар балага яңа белемнәрне хәтеренә ныграк сеңдерүгә ярдәм итә. Аларның базар мөнәсәбәтләре ыгы-зыгысында югалып калмый торган кешеләр булып үсүенә, Законны белүләренең үзләренең кулланучы буларак хокукларын яклавына ярдәм итәсенә ышанабыз”.
Очрашу истәлеккә фотога төшү, киләсе елда да очрашырга теләк белдерү белән төгәлләнде.