Сыйфатсыз товарга юлыктым, ә кибет инде ябылган…

Гарантия срогы дәвамында товарда теге яки бу кимчелек беленеп, сыйфатына дәгъва белдерергә кеше табып булмаса: кибет ябылса яки урнашу урынын үзгәртсә, яисә сәүдә предприятиесе хуҗалык эшчәнлеген туктатса, кулланучыга нәрсә эшләргә кала?

“Кулланучылар хокукларын яклау турында” 07.02.1992  ел, № 2300-1 Россия Федерациясе Законының 18 статьясы (алга таба – Закон) нигезендә, кулланучы сатучыга яки вәкаләтле оешмага, яисә вәкаләтле хосусый эшмәкәргә товарның сыйфаты буенча үзенең дәгъваларын белдерүгә хокуклы.

Законның 10 статьясындагы 2 пункты нигезендә, товар турында мәгълүматларда, шул исәптән, җитештерүченең, вәкаләтле оешма яки вәкаләтле хосусый эшмәкәрнең, импортерның адресы (урнашу урыны), фирма атамасы (атамасы) турында мәгълүматларның  күрсәтелүе мәҗбүри.

Бу оешмалар турында ниндидер сәбәпләр аркасында мәгълүматлар алып булмаган очракта, төшенкелеккә бирелмичә генә, түбәндәгеләрне белеп торырга кирәк.

Сыйфатсыз товарны хосусый эшмәкәр саткан икән, эшчәнлеген туктатуга һәм сәүдә ноктасын ябуга карамастан, ул, кулланучылар хокукларын яклау турында закон нигезендә, үзе саткан товарларның сыйфаты өчен җаваплылык тотуны дәвам итә.

Юридик зат үзгәртеп оештырылу тәртибендә юкка чыгарылган очракта, кулланучы бу юридик затның хокукый дәвамчысына дәгъва белән мөрәҗәгать итүгә хокуклы. Россия Федерациясе Гражданлык кодексының 58 статьясы нигезендә, юридик затлар үзгәртеп оештырылганда:

1. Юридик затлар берләштерелгәндә, һәркайсының хокуклары һәм бурычлары яңа пәйда булган юридик затка күчә.
2. Бер юридик зат икенче юридик затка кушылганда, соңгысына үзенә кушылган юридик зат хокуклары һәм бурычлары күчә.
3. Юридик зат бүленгәндә, аның хокуклары һәм бурычлары, тапшыру акты нигезендә, яңа пәйда булган юридик затларга күчә.
4. Юридик зат составыннан бер яки берничә юридик зат аерылып чыкканда, тапшыру акты нигезендә, аларның һәркайсына үзгәртеп оештырылган юридик зат хокуклары һәм бурычлары күчә.
5. Үзенә  бер төрле оештыру-хокукый формасына ия булган юридик зат икенче бер төрле оештыру-хокукый формасындагы юридик зат итеп үзгәртеп оештырылганда, үзгәртеп оештырылган юридик затның хокуклары һәм бурычлары башка затларга карата үзгәрми, гамәлгә куючыларга (катнашучылар) карата хокуклар һәм бурычлардан (үзгәртеп оештырылуга бәйле рәвештә үзгәрүгә дучар булган) тыш.

Оешма турында мәгълүматларны Федераль салым хезмәтенең рәсми сайтындагы  (http://egrul.nalog.ru/)  ИНН, ОГРН буенча белергә яки салым инспекциясендә оешма турында  ЕГРЮЛдан өземтә алырга була.

Кулланучы таләпләре ихтыярый рәвештә канәгатьләндерелмәгән очракта бәхәс суд тәртибендә хәл ителергә мөмкин.