Балтач бистәсендә халыкны акыллы кулланучы булырга өйрәттек

2017 елның 24 ноябрендә Татарстан Республикасы Дәүләт алкоголь инспекциясенең Арча территориаль органы хезмәткәре Г.Ф.Шакирова “Роспотребнадзор”ның ТР буенча идарәсе Арча, Биектау районнарындагы җирле бүлеге хезмәткәре белән берлектә Күп функцияле үзәкнең Балтач районындагы филиалында “Кулланучылар хокукларын яклау турында” РФ законын аңлату йөзеннән чара үткәрде. Халыкны хокукый яктан акны карадан аерырга өйрәтү төп максатка әйләнде.

Чарада күп функцияле үзәккә килүчеләр бик актив катнашты. Аларга кулланучылар хокукларын яклау һәм сәүдә кагыйдәләрен үтәү өлкәсендә гамәлдәге законнарны үтәү мәсьәләләре буенча консультацияләр бирелде, “Кулланучылар хокукларын яклау турында” 07.02.1992 ел, №2300-1 Россия Федерациясе Законының төп нигезләмәләре, Россия Федерациясе Хөкүмәтенең 19.01.1998 ел, №55 карары белән расланган Товарларның аерым төрләрен сату кагыйдәләре аңлатылды. Шулай ук претензия төзүгә ярдәм итү турында бер язмача мөрәҗәгать алынды.

   Чарада сыйфатлы һәм сыйфатсыз товарлар мәсьәләсе, аларны кире кайтару һәм башкасына алыштыру тәртибе каралды. Кулланучылар тарафыннан претензияләр кую ысулы һәм тәртибенә кагылышлы мәсьәләләргә, низаглы хәлләрне карап тикшергәндә якларның хокуклары һәм бурычларына тукталып үтелде.

Чара вакытында халыкка кулланучылар хокукларын яклау өлкәсендә буклетлар һәм «Вестник потребителя Татарстана» газетасының соңгы саннары таратылды.