Яраклылык вакыты чыккан сыра саткан өчен сатучыга нинди җаваплылык яный?
1995 елның 22 ноябрендәге 171-ФЗ номерлы федераль законның 26 статьясындагы 1 пункты нигезендә, этил спирты, алкогольле һәм спиртлы продукция җитештерү һәм аларны әйләнештә йөртү өлкәсендә законда билгеләнгән алкогольле продукцияне ваклап сату кагыйдәләрен бозу тыела, «Азык-төлек продуктларының сыйфаты һәм куркынычсызлыгы турында» 2000 елның 2 гыйнварындагы 29-ФЗ номерлы федераль законда билгеләнгән гомуми нормаларны исәпкә алып, андый таләпләргә яраклылык вакыты чыккан хәмер продукциясен сатуны тыю да керә. «Азык-төлек продуктларының сыйфаты һәм куркынычсызлыгы турында» 2000 елның 2 гыйнварындагы 29-ФЗ номерлы федераль закон нигезендә алкогольле продукция (шул исәптән сыра) азык-төлек продуктлары булып санала.
Яраклылык вакыты узган хәмер продукциясен сату техник регламентларның таләпләрен яки продукциягә карата тиешле техник регламентлар гамәлгә керәчәк көнгә кадәр кулланылырга тиешле зарури таләпләрне һәм мондый таләпләргә туры килми торган продукцияне проектлау (эзләнүне дә кертеп), җитештерү, төзү, монтажлау, көйләү, файдалану, саклау, бер урыннан икенче урынга алып бару, сату һәм утильләштерү яисә әйләнешкә чыгару процессларына бәйле таләпләрне бозу булып санала.
«Азык-төлек продуктларының сыйфаты һәм куркынычсызлыгы турында» 2000 елның 2 гыйнварындагы 29-ФЗ номерлы федераль законның (алга таба – 29-ФЗ номерлы федераль закон) 3 статьясындагы 2 өлеше нигезендә яраклылык вакыты билгеләнмәгән яки яраклылык вакыты узган азык-төлек продуктлары, материаллар һәм эшләнмәләр (яраклылык вакыты зарури тәртиптә билгеләнергә тиешле азык-төлек продуктлары, материаллар һәм эшләнмәләр өчен) сатуда булырга тиеш түгел.
РФ Баш дәүләт санитар табибының 2001 елның 7 сентябрендәге карары белән расланган СП 2.3.6.1066-01 Сәүдә оешмаларына һәм аларда азык-төлек чималы һәм азык-төлек продуктлары сатуга карата санитар-эпидемиологик таләпләрнең 8.24 пункты нигезендә сәүдә оешмаларында яраклылык вакыты узган продукция белән сәүдә итү тыела.
Әлеге хокук бозу өчен Административ хокук бозулар турында РФ кодексының 14.43 статьясының 2 өлешендә административ җаваплылык каралган; әлеге хокук бозуны кабатлаган очракта Административ хокук бозулар турында РФ кодексының 14.43 статьясының 3 өлешендә административ җаваплылык каралган.