“CAPITOL" ны күрми, товар ала күрмә”

Кулланучыларның консультацияләр алу максатыннан мөрәҗәгать итүләре ешаю сәбәпле, шулай ук кулланучылар базарында бозуларны кисәтү максатыннан, Татарстан Республикасы Дәүләт алкоголь инспекциясенең Казан территориаль органы тәкъдиме белән башкалабызның “Южный” сәүдә-күңел ачу комплексында урнашкан “CAPITOL" кибете хезмәткәрләре өчен семинар уздырылды. Әлеге очрашу низаглы хәлләр килеп чыгуны булдырмау, килеп чыкканда – аларны закон нигезендә хәл итү, кулланучылар хокукларын яклау өлкәсендәге белемнәрне барлау-чарлау максатын күздә тотып оештырылды.

Семинар барышында кибет хезмәткәрләре кулланучылар хокукларын яклау өлкәсендәге мөнәсәбәтләрне җайга салучы законнар һәм норматив актлар белән таныштырылды. Шулай ук аларның игътибарына “Дәүләт контрольлеген һәм муниципаль контрольлекне хәл иткәндә юридик затларның һәм хосусый эшмәкәрләрнең хокукларын саклау турында” 26.12.2008 ел, № 294-ФЗ Федераль законның төп нигезләмәләре җиткерелде.

Сатудагы товарларга бәя белешмәлекләрен (ценник) дөрес тутыру, сатучы  турында һәм, кулланучының үзенә чыннан да кирәклесен сатып алуы өчен, товарлар турында мәгълүматларның дөрес булу, кирәкле барлык документларга ия булу зарурилыгына күрсәтеп үтелде. Кулланучы әйбернең составы, аны карап тоту (юу, саклау һ.б) ысуллары һәм кагыйдәләре, шулай ук гарантия сроклары турында вакытында һәм аңлаешлы формада мәгълүмат алырга тиеш. Үлчәмнәр турында мәгълүмат ир-атларның һәм хатын-кызларның буй-сыннары (гадәттәге) классификациясен җайга салучы ГОСТларга туры килергә тиеш.

Сатучылар игътибарына тагын шул җиткерелде: җитештерүче билгеләмәгән очракта, товарга гарантия срогын алар үзләре үк билгели ала. Җитештерүче билгеләгән гарантия срогы чыкканнан соң товарда ачыкланган кимчелекләргә карата сатучы үзенә бурыч кабул итүгә дә хокуклы. Сатып алучыларга товарны сатып алу өчен өстәмә кызыксындыру тудыру, ә сатучыларга – өстәмә керем  дигән сүз бу. Сезонлы товарларга (кием-салым, мехтан тегелгән товарлар һ.б) гарантия срогы тиешле сезон башланган вакыттан (аның башлану срогын, сатып алучыларның яшәү урыннарының климат шартларыннан чыгып, Россия Федерациясе субъектының вәкаләтле дәүләт органы билгели) исәпләнелә.

Чараның икенче өлеше сорауларга җавап бирү рәвешендә уздырылды. Мехтан тегелгән әйберләрне сатуга; низаглы хәлләрнең конкрет очракларына; шул исәптән сыйфатлы товарны кире кайтару очракларына; товарларда җитешсезлекләрнең килеп чыгу сәбәпләре һәм экспертизалар үткәрү срокларына кагылышлы күп кенә сорауларга тиешле җаваплар бирелде.  Әйтергә кирәк, сорауларда кибет хезмәткәрләренең сатып алучыларга сыйфатлы хезмәт күрсәтү омтылышы бик ачык сизелде.

Сатып алучы белән сатучы арасында килеп туган бәхәсле мәсьәләләрне хәл кылу өчен эксперт оешмаларына (алар турында мәгълүмат белән Татарстан Республикасы Дәүләт алкоголь инспекциясе сайтында – www.tatzpp.ru) мөрәҗәгать итү тәкъдиме җиткерелде.

Кибет җитәкчелеге компания хезмәткәрләре өчен бик вакытлы һәм файдалы мәгълүматлар җиткерелүенә рәхмәтен белдерде.