2013 елгы XXVII Бөтендөнья җәйге универсиада алдыннан

Бүген, Казан шәһәре бик зур спорт чараларын үткәрергә җыенган бер мәлдә, куллану товарлары һәм хезмәтләр күрсәтү сыйфатын яхшырту үтә мөһим бурычларның берсе булып тора. Кунакханә индустриясендә эшләүче персоналның квалификациясен күтәрүгә аерым зур игътибар бирергә кирәк.  Башкалабыз кунакларына күрсәтеләчәк хезмәтләр сыйфаты тулаем республикабыз имиджын булдырачак факторларның берсенә әйләнергә тиеш бит.

“Н.Э.Бауман исемендәге КГАВМ” ФГОУ ВПО (гади генә итеп әйткәндә – ветеринария институты) (адресы: Казан ш., Себер тракты, 35 й.) каршындагы ашханәдә хәзергә студентлар һәм укытучыларны кайнар аш-су белән тукландыру оештырылган. Җәйге Универсиаданы үткәрү барышында исә әлеге предприятие спорт чарасының хезмәт күрсәтү персоналын тукландыру эшенә җәлеп ителәчәк.

Татарстан Республикасы Дәүләт алкоголь инспекциясенең Казан территориаль органы белгече ашханә җитәкчелеге чакыруы буенча предприятие хезмәткәрләре өчен кулланучылар хокукларын яклау өлкәсендә җәмәгать туклануы хезмәте күрсәтү мәсьәләләре буенча семинар үткәрде.

Стадионнарда төрле чаралар үткәрелгәндә һәм шәһәр урамнарында тәртип булдыруга җаваплы кешеләрне билгеле бер суммага тәмле итеп, ризыкларны төрләндереп ашату әлеге ашханәнең төп бурычына әйләнәчәк. Әйтергә кирәк, җаваплы һәм мактаулы эш. Шуңа күрә ашханә менюсы һәм хезмәт күрсәтү формалары инде хәзер үк игътибар үзәгендә булырга тиеш.

Ашханә хезмәткәрләре белән семинарларның инде моңарчы да үткәрелгәне бар иде. Шуңа күрә аларга кулланучылар хокукларын яклау өлкәсендәге законның төп нигезләмәләре, азык-төлеккә техник регламентлар, Сату һәм җәмәгать туклануы хезмәтләре күрсәтү кагыйдәләре һ.б чит-ят әйберләр түгел. Фәкать товарларның аерым төрләрен сату кагыйдәләрендәге соңгы үзгәрешләр генә тәфсилләп яктыртылды.

Семинарга җыелган халыкның төп игътибары аш-сулар турында, аларның составы, җәмәгать туклануы продукциясенең азык кыйммәте турында тулы һәм дөрес мәгълүмат җиткерү зарурилыгына юнәлтелде. Ашханә хезмәткәрләре, Казаныбыз кунакларның күңеленә ныграк уелып калсын өчен, татар милли ашларына “басым ясамакчы”. Чимал сыйфаты, продуктларны саклау кагыйдәләре һәм сроклары, суыткычларның төзеклеге, объектның санитария торышы, хезмәт күрсәтү ысуллары һәм сыйфаты даими игътибар үзәгендә булырга тиеш.

Ә Универсиадага кадәр студентларны ашату-эчертү ягын карауны дәвам иттерергә кирәк. Аларның сәламәтлеге, өлгереше, кәеф-рухы нәрсә ашауларыннан, ризыкның тулы кыйммәтле булу-булмавыннан да тора бит. Шуңа күрә семинарда бу проблема буенча да фикер алышу булды.

Бүгенге студентларның тормышы бик төрле һәм киеренке. Бигрәк тә аларның нерв системасына авырга туры килә. Шул ук вакытта студентларның сәламәтлекләре турында кайгыртуга вакытлары да, әлләни зур теләкләре дә юк. Студентлар күп очракларда даими тукланмый, кайда туры килсә, шунда капкалап йөри.  Бу исә кайвакыт хәтта сыйфатсыз ризыктан агулану очракларына да китерергә мөмкин. Шуңа күрә аларга фаст-фуд ише урыннарда түгел, бәлки студентлар ашханәсендә тамакларын туйдыру әйбәт.

Продуктларны сайлаганда, студентларның кесә ягы такыр булуын истән чыгармаска кирәк. Студентларның рационын биологик яктан кыйммәтле аксымнар белән тәэмин итү өчен аларның очсызлы чыганакларын (субпродуктлар, өсте алынган сөт, майсыз кефир һ.б) куллану әйбәт. Организмның майга ихтыяҗын тәэмин итү өчен рационга үсемлек мае һәм атланмай (эретелмәгән, кыздырылмаган килеш) (20-25 г) кертү шарт. Татла-баллы ризыклар исә күп булмаска тиеш. Аз хәрәкәтләнүнең аянычлы нәтиҗәләрен юкка чыгару өчен рационга азык җепселләре чыганагы булып торган үсемлек продуктларын кертү фарыз.

Ашханә хезмәткәрләре студентларның туклануын нәтиҗәле итү өчен кулланыла торган методикалар турында сөйләде, проблемалары, уңышлары белән уртаклашты.

Очрашу азагында һөнәри эшчәнлектә һәм көнкүрештә очрый торган төрле сорауларга: җәмәгать туклануы хезмәтен күрсәтү тәртибе; продукциянең сыйфатын һәм куркынычсызлыгын раслаучы озату документлары; җирле җитештерүчеләр продукциясе белән тәэмин итүчеләр һәм мондый продукциянең өстенлекләре; җәмәгать туклануы предприятиеләренең төрле типларына карата таләпләр; туристларга хезмәт күрсәтү; ЖКХ хезмәтләре күрсәтү; техник яктан катлаулы товарлар сатып алудагы проблемалар һ.б буенча сорауларга җаваплар бирелде. Көнкүрештәге төрле мәсьәләләр, шул исәптән ашханәгә сыйфатсыз продукция җибәрелгән очракта нинди гамәлләр кылу зарурилыгы, туклануга карата студентларның таләпләре һәм нинди ризыкларга өстенлек бирүләре конкрет мисалларда карап тикшерелде.

Яклар үткәрелгән семинардан канәгать калды.