Срогы чыккан ризыкларны сатуга кем җаваплы?

Кибеттән яраклылык срогы чыккан ризык сатып алу очрагына юлыкмаган кешеләр, булса да, бик сирәктер. Шул ук вакытта күпләребез мондый ризыкның организмга нинди зыян салуына әлләни әһәмият бирми. Ә әһәмият бирергә кирәк. Бик кирәк. Галимнәр саклау вакыты чыккан ризыкның организмны агулап кына калмыйча, гомеребезгә дә янавын күптән раслады инде. Искергән ризыкта бактерияләр хасил итә торган токсиннар күп була. Димәк, яраклылык вакыты чыккан азык-төлектә алар бихисап. Бигрәк тә супермаркетларда әзерләнелә торган салатлардагы майонезга кагыла бу. Майонез составына кергән йомырка, шулай ук салаттагы колбаса, ит озак саклаганда бозыла башлый.

ТР Дәүләт алкоголь инспекциясенең Әлмәт территориаль бүлеге агымдагы февраль аенда саклау срогы чыккан азык-төлек сатуның (барлыгы 27102 сумлык) 13 очрагын  ачыклады.

Территориаль орган белгечләре барлык сатып алучыларга киңәш итә:

– кибет киштәләренә игътибарлы булырга – алгы рәтләрдә гадәттә күптәнге ризыклар әвәләнеп ята, “свежий”лары киштәнең артына ук яшереп диярлек куела;

– теләсә кайсы продуктның төрелмәсендә күрсәтелергә тиешле җитештерү датасына күз салырга. Кулланучыларны иң элек продуктлар составы һәм товар атамасы кызыксындыра, яраклылык срогы исә икенче планда кала. Намуссыз сатучылар саклау вакыты чыккан продуктларның җитештерү датасы өстенә штрих-код ябыштырып куярга да күп сорап тормый. Кат-кат ябыштырылмаганмы икән бу, дип шикләнсәгез, товарны алмагыз, чөнки ул бозылган булырга мөмкин. Әлмәт территориаль органы белгечләре, “кыяфәтен” матурлау өчен, ысланган колбасаны, юып, май белән майлап кую; сырның күксегән кырыйларын кисеп алып, берни булмагандай сату очракларын һ.б ачыклады. Ояты качкан эшмәкәрләр, беркатлы сатып алучыларны алдау максатыннан, нинди генә хәйләләр уйлап тапмый!

Февраль аенда Әлмәт территориаль органына гражданин Н.нан мөрәҗәгать керде. Баксаң, Әлмәттә чикләвек продукциясе (фисташка, арахис һ.б) җитештерүче компаниянең товар җибәрүчеләреннән берсе товарның җитештерү датасын бетереп, төрелмәгә яңа мәгълүматлар язып куя икән. Әлеге мөрәҗәгать аерым игътибар үзәгенә алынды, һәм бу хокук бозуны ачыклау эше алып барыла.

ТР Дәүләт алкоголь инспекциясенең Әлмәт территориаль органы белгечләре контрольлек чаралары үткәрү барышында сәүдә оешмалары җитәкчеләре һәм хезмәткәрләре белән профилактика эше алып бара, яраклылык вакыты чыккан товарларны инвентарьлаштыру нәтиҗәсендә ачыклап булуын аңлата. Саклау вакыты чыккан продукцияне ачыклау һәм документлаштыру процедурасын җиңеләйтү өчен товарны, учетны автоматлаштыру программасына кертеп, яраклылык вакыты турында мәгълүматларны күрсәтергә кирәк. Соңыннан мондый товарлар исемлеген автомат рәвештә булдырырга мөмкин булачак.