Пакетлы шәрабка санаулы көннәр калды

РАР сайтында хәбәр ителгәнчә, февраль ахырларында Кубаньда очсызлы шәраб җитештерүче өч зур предприятие: “Славянский” РПК, “Долина” ҖЧҖ һәм “Северский” ППК лицензияләренең гамәлдә булуы туктатылган. Тагын бер шәраб заводы – “Красноармейский” РПК – бөлгенлек процедурасы башлану сәбәпле инде узган елның ноябрендә үк эшен туктаткан. “Росстат” мәгълүматларына караганда, 2012 елда әлеге дүрт предприятие барлыгы 7,34 миллион дал шәраб җитештергән (Россиядә күбекләнми торган шәраб җитештерү күләменең 20,01 процентын тәшкил иткән).

РАР матбугат хезмәтеннән хәбәр итүләренчә, хәзерге вакытта предприятиеләрнең производство лицензияләрен юкка чыгару таләбе белән судка мөрәҗәгать итү өчен документлар әзерләнелә. Әлеге заводларның продукция үрнәкләрен тикшерү нәтиҗәләре әнә шундый катгый чаралар күрүгә сәбәп булды, дип белдерә федераль хезмәт. Тикшерүләр нәтиҗәсендә “Северский” ППК продукциясе үрнәкләренең 100 процентында,  “Долина” ҖЧҖ үрнәкләренең 83 процентында һәм “Славянский” РПК үрнәкләренең 74 процентында продукция сыйфатын тупас бозулар ачыкланган. Болар  – шәрабка су кушу, ГОСТ буенча файдаланырга ярамаган агулы микрокушылмалар һәм ароматизаторлар өстәү.

Краснодар краеннан дүрт зур җитештерүченең базардан китүе сыйфатлы, затлы шәрабны үз итүчеләр өчен коточкыч югалтуга әйләнмәс анысы. Әлеге компанияләрнең сайтларындагы мәгълүматларга караганда, аларның ассортиментын ваклап сатуда чама белән 80 сум торган бер литрлы пакетлардагы очсызлы шәраб тәшкил иткән. Россия Виноград игүчеләр һәм шәраб ясаучылар берлеге президенты Леонид Попович фикеренчә, шәраб ясаучыларның намуслылары регуляторның мондый катгый гамәлләрен хупларга гына мөмкин. “Бу предприятиеләр чыннан да начар продукция җитештергәндә тотылды. Аларның продукциясен шәраб дип атавы дә кыен”, – дип белдергән Попович әфәнде РБК daily хәбәрчесе белән әңгәмәсендә.

Аның әйтүенчә, Попович әфәнде РАРның шик тудырырлык дәрәҗәдә очсызлы шәраб җитештерүче барлык зур предприятиеләрдә тикшерүләр уздыруын көтә. “Җәза чаралары әлегә Краснодар крае предприятиеләренә генә кагыла, – дип билгеләп үткән СВВР президенты. – Тикшерүләрнең бер төбәк белән генә чикләнмәячәгенә өметләнәм – фәкать шул очракта гына дәүләтнең гадел якын килүе турында сүз куертып булачак.   РАР матбугат хезмәтеннән РБК daily чыганагына хәбәр итүләренчә, хәзерге вакытта Россиянең башка төбәкләрендә дә кайбер предприятиеләргә шундый тикшерүләр алып барыла.

“Росстат” мәгълүматларына караганда, 2012 елда Россиядә Адыгеянең “Виктория” ТД предприятиесе күбекләнми торган шәраблар буенча иң зур җитештерүчегә (3,05 миллион дал) әйләнгән. Икенче урында – Минеральные Воды виноград шәрабы заводы (Ставрополь крае) – 2,5 миллион дал. 2012 елда иң эре шәраб җитештерүчеләр унлыгына пакетлардагы эконом-класс продукциясе буенча махсуслашкан сигез завод кергән.

ЦИФРРА тармак агентлыгы директоры Вадим Дробиз фикеренә караганда, Россиядә җитештерелгән пакеттагы очсызлы шәрабны базарда быелдан ары күреп булмаячак. “РАРның моның белән генә тукталып калмаячагына: бел литры 80 сум торган очсызлы шәраб җитештерүче башкаларны да тикшерәчәгенә шикләнмим, – дигән РБК daily хәбәрчесенә Дробиз әфәнде. – Нәтиҗәдә әлеге категория бөтенләй юкка чыгачак, чөнки ГОСТ таләпләрен үтәү нигезендә мондый очсызлы шәрабны җитештереп булмый.”