«Сабантуй» вакытында кизү тору оештырдылар
Татарстан Республикасы Дәүләт алкоголь инспекциясенең Әлмәт территориаль органы эчке базарны үстерү һәм координацияләү бүлеге хезмәткәрләре «2014-2025 елларга Татарстан Республикасында кулланучылар хокукларын яклауның комплекслы системасын үстерү» 6 нчы ярдәмче программасы чараларын үтәү кысаларында инвалидлар өчен оештырылган Сабантуйда катнаштылар.
Татарстан нефтенең 60 еллыгы исемендәге шәһәр паркында инвалидларны бүләкләделәр, алар өчен концерт номерлары, гер спорты, коляскада фигуралы йөрү, 100 метрга йөгерү, шашка, шахмат, дартс, бочче ярышлары оештырылды, балалар аттракционнары эшләде.
Мондый очрашуларның максаты - халыкның, бигрәк тә өлкән буынның, кулланучылар хокукларын яклау һәм кулланучылар хокукларын яклау турында закон таләпләрен үтәү мәсьәләләрендә хокукый белемен һәм хәбәрдарлык дәрәҗәсен күтәрү. Программа логотибы төшерелгән канцелярия товарлары, Дәүләт алкоголь инспекциясенең элемтә өчен мәгълүматлар белән файдалы буклетлары тапшырылды. Сораулар белән мөрәҗәгать иткән гражданнар мәгълүмати ярдәм алдылар.