Алкогольле продукция әйләнеше өлкәсендә закон бозулар ачыкланды
Бөтен ил өчен алкогольне кичке 23 сәгатьтән иртәнге 8 сәгатькә кадәр сату тыела дигән кагыйдә гамәлдә. РФ кайбер субъектларында хәмерне сатып алу рөхсәт ителми торган вакыт аралыгы арттырылган. Татарстан Республикасында бу 22 сәгатьтән 10 сәгатькә кадәр. Тик, кызганычка каршы, кайбер хуҗалык итүче субъектлар бу тыюны үтәми.
Административ хокук бозулар турында Россия Федерациясе Кодексының 14.16 статьясындагы 3 өлешендә каралган административ җаваплылыкка тарту өчен иртәнге сәгать 10га кадәр кибеттә, Россия Эчке эшләр министрлыгының Мөслим районы буенча бүлеге хезмәткәрләре һәм Татарстан Республикасы Дәүләт алкоголь инспекциясенең Түбән Кама территориаль органы белгече тарафыннан алкогольле продукцияне (сыра) ваклап сату факты нигез булды. Алкогольле продукцияне ваклап сатуның аерым таләпләрен һәм кагыйдәләрен бозу вазыйфаи затларга алкогольле продукцияне конфискацияләү белән егерме меңнән кырык мең сумга кадәр, юридик затларга – йөз меңнән алып өч йөз мең сумга кадәр, алкогольле продукцияне конфискацияләү белән яки аннан башка гына административ штраф салуга китерә.
Сыра сатканнан соң, сатучыларның гамәлдәге законнарны бозу теләге югалыр дип өметләнәбез.