1 июнь - Халыкара балаларны яклау көне
Балаларны яклау көне - балалар өчен күңелле бәйрәм генә түгел, ә барлык балалар да бәхетле булып үссен, укысын, яраткан эше белән шөгыльләнсен һәм киләчәктә үз иленең лаеклы гражданнарына әверелсен өчен, бала хокукларын яклау кирәклеге турында җәмгыятькә искәртү дә.
Шулай ук 1 июньнән укучыларның көтеп алынган җәйге каникуллары башлана.
Татарстан Республикасы Буа муниципаль районы Түбән Наратбаш төп гомуми белем бирү мәктәбенең башлангыч сыйныф укучылары (1-4 сыйныфлар) бәйрәм көнен табигатьтә билгеләп үттеләр. Педагоглар спорт ярышлары оештырдылар: чабышлар, ераклыкка сикерү, 25 метрга йөгерү, туп белән уеннар һ.б. Бу чарада Татарстан Республикасы Дәүләт алкоголь инспекциясенең Яшел Үзән территориаль органы хезмәткәре Гүзәл Гайнуллина да кунакта булды. Очрашуның максаты - укучыларны Россия дәүләтендә кулланучының хокукый статусы белән таныштыру, дөрес кулланучы тәрбияләү, көндәлек тормышта кулланучыларның хокукларын һәм законлы мәнфәгатьләрен, шулай ук сатучыларның хокукларын һәм законлы мәнфәгатьләрен ничек яклавын күрсәтү. Кулланучыларның кем булуы, кулланучыларның төп хокуклары нинди, көндәлек тормышта кулланучыларның хокуклары һәм законлы мәнфәгатьләре ничек яклануы турында сөйләштеләр. Хезмәткәр уен формасында дәрес үткәрде, мисал буларак, рус халык әкиятләре геройларына таянды.
Чара ахырында Татарстан Республикасы Дәүләт алкоголь инспекциясе хезмәткәре балаларны татлы ризыклар белән сыйлады һәм матур тематик буклетлар тапшырды.