Кулланучы әлифбасы: җитешсезлекләрнең барлыкка килү сәбәбен расларга кирәк
Сатып алынган товар һәрвакытта да шатлык китерми. Әйтик, гражданин дача өчен электр триммерын (электрокос) сатып алган. Ләкин ул беренче көнне үк эшләми башлый. Бакчачы сатучыга кимчелекләре булган товарны алыштыру үтенече белән мөрәҗәгать итә. Әмма сатучы товарны карап чыкканнан соң, товардагы җитешсезлекләр дөрес файдаланмау аркасында килеп чыккан, дигән нәтиҗә ясый, аның электр моторы сафтан чыккан, дип белдерә. Сатып алучы моның белән килешми һәм консультация сорап Чистай территориаль органына мөрәҗәгать итте.
Инспекция белгечләре кулланучыга Кулланучылар хокукларын яклау турында законнарны аңлаттылар. Электр триммеры техник яктан катлаулы товарлар исемлегенә керә. «Кулланучылар хокукларын яклау турында» РФ Законының 18 статьясы нигезендә, кулланучы, товарда җитешсезлекләр ачыкланган очракта, шартнамә үтәлешеннән баш тартырга һәм товар өчен түләнгән сумманы кире кайтаруны таләп итәргә яки аны кулланучыга тапшырганнан соң унбиш көн эчендә алыштыруны таләп итәргә хокуклы. Җитешсезлекләр килеп чыккан очракта, сатучы кулланучыдан сыйфатсыз товарны кабул итәргә һәм кирәк булган очракта товарның сыйфатын тикшерү уздырырга тиеш. Кулланучы сыйфатны тикшерүдә катнашырга хокуклы. Товарда җитешсезлекләр килеп чыгу сәбәпләре турында бәхәс чыккан очракта, сатучы үз хисабына товарга экспертиза үткәрергә тиеш.
Гарантия срогы билгеләнгән товарга карата сатучы товарның җитешсезлекләре өчен җавап бирә, әгәр дә кулланучының товарны тапшырганнан соң, товарны куллану, саклау яки ташу, өченче затларның гамәлләре товарны кулланучыга тапшырганнан соң барлыкка килгәнлеген расламаса.
Шулай итеп, кайчагында экспертиза нәтиҗәләре буенча гына сату-алу килешүендә гаепле якны билгеләргә мөмкин.
Кулланучы үтенече буенча аңа дәгъва проекты әзерләүдә ярдәм күрсәтелде.