Җиһан сатып алучының хокуклары һәм бурычлары
Татарстан Республикасы Дәүләт алкоголь инспекциясенең Әлмәт территориаль органына алдан түләнгән товарны тапшыру срогы бозылу сәбәпле кулланучы гражданнарының мөрәҗәгатьләре еш килә. Шуңа бәйле рәвештә Әлмәт территориаль органы хезмәткәрләре тарафыннан хуҗалык итүче субъектлар өчен кулланучылар хокукларын яклау өлкәсендә законнарны аңлату чаралары үткәрелә.
Менә күпсанлы шикаятьләрнең берсе:
- Диванга заказ бирдем, акчасын түләдем. Заказны үтәү вакыты 1 айга кичектерелде.
Әлмәт территориаль органы аңлатма бирә:
- Әгәр җиһаз компаниясе сатып алу-сату килешүе нигезендә түләнгән товарны китерү вакытын боза икән, компания яки кибет җитәкчесе адресына дәгъва җибәрергә кирәк. Сатучыга ике данәдә язма рәвештә дәгъва языла (сатучының кабул итү турында билгесе булган экземплярны үзендә калдырып).
Әгәр сатып алу-сату килешүе белән билгеләнгән күләмдә алдан түләү суммасын алган сатучы товарны кулланучыга шундый килешү белән билгеләнгән вакыт эчендә тапшыру бурычын үтәмәсә, кулланучы үз сайлавы буенча түбәндәгеләрнең берсен таләп итәргә хокуклы:
- түләнгән товарны ул билгеләгән яңа срокка тапшыру;
- сатучы тапшырмаган товар өчен алдан түләнгән сумманы кире кайтару.
Шул ук вакытта кулланучы алдан түләнгән товарны китерүнең сатып алу-сату килешүе белән билгеләнгән срогын бозу нәтиҗәсендә аңа китерелгән зыянны тулысынча түләүне таләп итәргә хокуклы.
Сатучы түләнгән товарны тапшыру вакытын бозган очракта, сатучы кулланучыга һәр кичектерелгән көн өчен алдан түләнгән сумманың 0,5 проценты күләмендә неустойка түләргә тиеш. Түләтелгән неустойка суммасы мебель өчен кертелгән алдан түләү суммасы күләменнән артмаска тиеш. Бу хокук РФ «Кулланучылар хокукларын яклау турында»гы Законының 23.1 маддәсендә язылган.
Кулланучы хокуклары бозылган яки аның законлы таләпләре ирекле тәртиптә канәгатьләндерелмәгән очракта, «Кулланучылар хокукларын яклау турында» РФ Федераль законының 17 статьясы нигезендә, үз хокукларын һәм законлы мәнфәгатьләрен яклау өчен кулланучыга мебель өчен акчаны кире кайтаруны, мебель өчен акчаны кире кайтару срокларын бозган өчен неустойка түләтүне, китерелгән мораль зыянны компенсацияләүне таләп итеп, судка мөрәҗәгать итәргә кирәк.