Эчке кагыйдәләр законнарга туры килергә тиеш
Гаҗәп, ләкин хәзер дә кибетләрдә сертификат кире кайтарылырга яки алыштырылырга тиеш түгел дигән төзәтмә белән белдерүләр очратырга мөмкин икән. Бу хакта инде күп сөйләнде һәм аңлатылды, ләкин мондый белдерүләрне яңа ел алдыннан кайбер кибетләрдә күрергә мөмкин иде.
Мондый раслау дөресме?
Татарстан Республикасы Дәүләт алкоголь инспекциясенең Түбән Кама территориаль органы хезмәткәрләре моны хокуксыз дип аңлаталар, чөнки бүләк сертификаты (яки бүләк картасы) - товарлар яки хезмәтләр өчен билгеле бер суммага түләүне раслый торган документ, аванс түләве кертелгән, дигән сүз. Шуңа күрә сертификатны гадәти ысул белән сатып алынган товарлар кебек үк кире кайтарырга яки алыштырырга мөмкин. «Кулланучылар хокукларын яклау турындагы» РФ Законының 23.1 маддәсе нигезендә товар сатып алучыга тапшырылганчы яки хезмәт күрсәтелмәгәнче сату-алу килешүе төзелмәгән дип саналачак. РФ Гражданлык кодексының 421 маддәсендә гражданнар һәм юридик затлар килешү төзүдә ирекле, шуңа бәйле рәвештә кулланучы сатып алудан баш тартырга, шулай ук түләнгән авансны кире кайтаруны таләп итәргә хокуклы дип билгеләнгән. Моның өчен сертификатка сарыф ителгән барлык акчаларны яки товар (хезмәт) сатып алганнан соң калган сумманың бер өлешен кире кайтаруны таләп итеп, кибет адресына язма дәгъва юлларга кирәк. «Кулланучылар хокукларын яклау турында» РФ Законының 23.1 маддәсенең 4 пункты нигезендә кулланучының товар өчен түләнгән сумманы кире кайтару һәм зыянны тулысынча каплау турындагы таләпләре тиешле таләп куелган көннән алып ун көн эчендә сатучы тарафыннан канәгатьләндерелергә тиеш. Кибетләрнең бернинди эчке кагыйдәләре дә сертификатны кире кайтару мөмкинлегенә йогынты ясамый, кагыйдәләр «Кулланучылар хокукларын яклау турында» РФ Законына һәм гражданлык законнарына туры килергә тиеш.