Укучылар үз хокуклары турында белделәр
Татарстан Республикасы Дәүләт алкоголь инспекциясенең Әлмәт территориаль органы хезмәткәре Кадрия Галиева Баулы шәһәренең 7 нче мәктәбендә 6 нчы сыйныф укучылары өчен класс сәгате үткәрде. Дәреснең темасы: «Кулланучы үз хокукларын белергә тиеш».
Дәреснең беренче яртысында укучылар «Кулланучылар хокукларын яклау турында» РФ Законы һәм сәүдә кагыйдәләре нигезендә теоретик белемнәр алдылар. Дәреснең икенче өлешендә кулланучылар очраша торган тормыштан конкрет ситуацияләрне тикшерделәр. Һәр конкрет ситуациядә нишләргә, сатучыга карата дөрес итеп язма дәгъва әзерләргә, аларның хокуклары бозылган очракта нинди оешмаларга ярдәм сорап мөрәҗәгать итәргә мөмкин булуы һ. б. турында аңлатмалар бирелде.
Очрашу ахырында барлык катнашучылар территориаль органнар контактлары белән кулланучылар хокукларын яклау буенча файдалы мәгълүмат белән буклетлар алдылар.