«Пятерочка» һәм «Магнит» кибетләрендә консультация өстәле эшләде
Татарстан Республикасы Дәүләт алкоголь инспекциясенең Яшел Үзән территориаль органы хезмәткәрләре, Роспотребнадзорның Яшел Үзән территориаль бүлеге белгеч-эксперты Зөлфия Әсәдуллина белән берлектә, Яшел Үзән шәһәренең «Пятерочка» һәм «Магнит» кибетләрендә хуҗалык итүче субъектлар вәкилләре өчен укулар, шулай ук кулланучылар өчен консультация чаралары үткәрделәр.
«Кулланучылар хокукларын яклау турында»гы законны дөрес үтәү сатып алучы белән сатучы арасындагы мөнәсәбәтләрне уңышлы җайга салуның нигезе булып тора. Закон нигезендә, һәр кулланучы тормыш, сәламәтлек һәм мөлкәт өчен сыйфатлы һәм имин товарга, товарны кире кайтаруга яисә аны алмаштыруга, сыйфатсыз товар белән бәйле чыгымнарны компенсацияләүгә, шулай ук башка гарантияләргә хокуклы.
Өлкән яшьтәге сатып алучыларда челтәр кибетләрендә товарлар сатып алганда очраша торган сораулар туды:
- кибет киштәсендә товарның бәясе бер, ә кассада бу товарны икенче бәядән саталар;
- товарның килограммга түгел, ә граммга күрсәтелгән бәясе буталчык тудыра;
- әгәр бәяләр буталган булса, мәсәлән, атланмай астында йогурт бәясе урнашкан булса, нишләргә?
Мондый хәлгә эләккән сатып алучыларга кибет администраторына мөрәҗәгать итәргә, әлеге проблема турында хәбәр итәргә һәм товарны күрсәтелгән бәядән сатуны сорарга кирәклеген аңлаттылар, ә инде товар өчен түләгән булсалар һәм хатаны соңыннан гына сизсәләр, кибет барыбер чек белән бәя арасындагы бәя аермасын кайтарырга тиеш.
Кибет хезмәткәрләре закон бозган очракта сатучының җаваплылыгы, сатучыдан сатып алучы нинди мәгълүмат таләп итә алуы, товар сыйфатсыз булып чыккан очракларда сатучының һәм сатып алучының бурычлары турында белделәр.