Кулланучы әлифбасы: сәүдәнең дистанцион ысулы турында без нәрсәләр белергә тиеш?
Сатуның дистанцион ысулы - ваклап сату-алу шартнамәсе, ул кулланучының сатучы тәкъдим иткән товарның каталоглар, проспектлар, буклетлар, фотосурәтләр, элемтә чаралары яисә мондый шартнамә төзегәндә кулланучының товар белән йә товар үрнәге белән турыдан-туры танышу мөмкинлегеннән мәхрүм итә торган ысуллар ярдәмендә товарның тасвирламасы белән танышуы нигезендә төзелгән. Мондый ысул уңайлы һәм отышлы. Еш кына турыдан-туры танышмыйча дистанцион рәвештә сатып алына торган товарларның бәясе стационар сәүдә ноктасындагы шундый ук товарларга караганда түбәнрәк була.
Сатып алучы, өйдән чыкмыйча гына, кирәкле әйберне ашыкмыйча гына сайлый ала, фотосурәтләрне карый һәм товарларның тасвирламаларын каталогларда, буклетларда өйрәнә. Кулланучылар белән төрле очрашуларда, сәүдә үзәкләрендә, базарларда булсынмы, пенсионерлар белән очрашуларда дистанцион сәүдәгә кагылышлы сорауларга җавап бирергә туры киләчәк, бигрәк тә кулланучыларны товарны кире кайтару кагыйдәләре кызыксындыра.
Дистанцион сәүдә иткәндә кулланучы товарның үзе белән дә, аның үрнәге белән дә турыдан-туры таныша алмый. Шуңа күрә, товарны дистанцион сатып алганда, кулланучы кимчелекләре булмаган товарны алганнан соң 7 көн эчендә кире кайтарырга хокуклы. Шул ук вакытта закон тарафыннан кире кайтару сәбәпләре билгеләнми, ягъни алар теләсә нинди булырга мөмкин.
Шуны истә тотарга кирәк: тиешле сыйфатлы товарны кире кайтару аның товар төре, куллану үзенчәлекләре һәм товарны сатучыдан сатып алу фактын һәм шартларын раслый торган документ сакланып калган очракта мөмкин.
Әгәр нинди дә булса сәбәпләр аркасында товар сатып алу фактын раслый торган документ кулланучыда булмаса, бу аны товар сатып алуның башка дәлилләренә сылтама ясау мөмкинлегеннән мәхрүм итми (шаһит күрсәтмәләре, интернет-сайтлардан алынган язмалар һ.б.).
Шуны да истә тотарга кирәк: барлык товарларны да тиешле сыйфатлы товар буларак кайтарып булмый. Индивидуаль-билгеле үзлекләре булган товардан баш тартырга ярамый. Бу әлеге товар кулланучы өчен индивидуаль эшләнгән дигәнне аңлата, һәм аны бары тик ул гына куллана ала. Мәсәлән, аяк киемен индивидуаль, конкрет кулланучы тәкъдим иткән үлчәмнәр буенча әзерләү.
Акчаларны кире кайтару мондый таләп куелганнан соң 10 көн эчендә гамәлгә ашырыла.
Әгәр кулланучыга сыйфатсыз товар тапшырылган булса, ягъни анда нинди дә булса кимчелекләр булса, кулланучы түбәндәге таләпләрне куярга хокуклы:
- кимчелекләрне түләүсез бетерү;
- сатып алу бәясен тиешенчә киметү;
- шундый ук маркалы товарга йә сатып алу бәясен тиешенчә яңадан исәпләп, башка маркалы товарга алмаштыру;
- шартнамәне үтәүдән баш тарту һәм товар өчен түләнгән акчаларны кире кайтару.