Кулланучылар хокукларын яклау: сыйфатлы товарны ничек сайларга?
Халыкка сыйфатлы товарлар сатып алуның мөһим аспектлары турында мәгълүмат бирү өчен, төрле ведомстволар вәкилләре Аксубай районының сәүдә объектларында булдылар.
Татарстан Республикасы Дәүләт алкоголь инспекциясенең Түбән Кама территориаль органы контроль-инспекция бүлегенең әйдәүче белгеч-эксперты Ирина Ершова, Роспотребнадзорның Татарстан Республикасы буенча территориаль бүлегенең Аксубай районындагы өлкән белгече Гүзәл Исмәгыйлева һәм район икътисад бүлегенең әйдәүче белгече Елена Лодоркина район үзәгендәге азык-төлек кибетләрендә сатып алучылар белән очрашу үткәрделәр. Алар гражданнарга экологик чиста һәм сәламәтлек өчен файдалы продуктлар сайлауның мөһимлеге турында сөйләделәр, шулай ук Кулланучылар хокуклары һәм аларны яклау ысуллары турында мәгълүмат белән уртаклаштылар.
– Товарны сатып алу аңлы булырга тиеш, һәм һәр сатып алучының аның сыйфатына ышанырга хакы бар, - дип ассызыклады Гүзәл Исмәгыйлева. Ул билгеләп үткәнчә, сатып алуда проблемалар килеп чыккан очракта, кулланучылар ярдәм сорап Роспотребнадзорның Татарстан Республикасы буенча территориаль идарәсенә, Дәүләт алкоголь инспекциясенең Түбән Кама территориаль органы белгечләренә яки районның икътисад бүлегенә мөрәҗәгать итә алалар.
Сатып алучылар белән аралашудан тыш, очрашуда катнашучылар сатучылар һәм кибет директорлары белән азык-төлек товарларын сату буенча таләпләр турында сөйләштеләр. Көн азагында белгечләр күпфункцияле үзәктә булдылар, анда район халкы өчен кулланучылар хокукларын яклау мәсьәләләре буенча консультацияләр үткәрделәр.