Ветераннар Советында очрашу булды
Күптән түгел Лениногорск районы һәм Лениногорск шәһәре ветераннар Советында мөһим очрашу булды. Очрашуга Татарстан Республикасы Дәүләт алкоголь инспекциясенең Әлмәт территориаль органы белгече Наталья Платонова чакырылган иде. Ул катнашучылар алдында «цифрлы технологияләрне кулланып, мошенниклыкның заманча төрләре» дигән темага лекция укыды.
Наталья Платонова цифрлы мошенниклыкның киң таралган схемалары, шул исәптән фишинг һөҗүмнәре, социаль инженерия методлары һәм онлайн-кибетләрдә алдау турында сөйләде. Мошенниклык гамәлләреннән саклану ысулларына аерым игътибар бирелде. Катнашучылар практик тәкъдимнәр алдылар, шулар арасында:
- компанияләрнең рәсми ресурсларындагы белешмәләрнең дөреслеген тикшерү;
- шәхси мәгълүматларны һәм банк карталары реквизитларын чит затларга тапшырудан баш тарту;
- кирәкмәгән трафикны блоклау өчен ике этаплы аутентификация һәм махсус кушымталар куллану.
Моннан тыш, белгеч Россия законнарындагы гражданнарның куркынычсызлыгын арттыруга юнәлдерелгән соңгы үзгәрешләр турында мәгълүмат белән уртаклашты: хәзер һәр кеше үз ризалыгыннан башка кулланучы кредиты алуны тыя ала, шулай ук бәйләнчек реклама рассылкаларыннан һәм телефон шалтыратуларыннан баш тарта алачак.
Лекциянең аерым өлеше «Кулланучылар хокукларын яклау турында» Федераль законда беркетелгән кулланучылар хокукларына багышланган иде. Наталья Платонова товарлар һәм хезмәтләр сатып алу кагыйдәләрен, сыйфатсыз сатып алуларны кире кайтару тәртибен һәм сатып алучылар белән сатучылар арасындагы бәхәсләрне хәл итү юлларын җентекләп аңлатты.
Һәр катнашучы файдалы материаллар — кулланучылар хокукларын яклау мәсьәләләре буенча мәгълүмати брошюра алды.