Бөек Ватан сугышы геройларын искә алу – безнең бурычыбыз
Бөек Ватан сугышында Җиңүнең 80 еллыгы уңаеннан Түбән Камада «Җиңү тәме» дип аталган гастрономия фестивале һәм осталар ярминкәсе узды. Бөек Ватан сугышы ветераннарын, тыл хезмәтчәннәрен, шәһәр халкын һәм кунакларны җыеп, Татар драма театры каршында бәйрәм җәелдерелде.
Анда шәһәрнең иҗат коллективлары әзерләгән концерт номерлары, укучыларның театраль куелышлары, төрле мастер-класслар һәм башка бик күп күңел ачу чаралары тәкъдим ителде. Бәйрәмдә гастрономия фестивале һәм осталар ярминкәсе оештырылды, анда кулдан эшләнгән уникаль әйберләр сатып алырга мөмкин иде.
Түбәнкамалылар 9 майга бәйрәм открыткалары, пилоткалар һәм тематик бизәнү әйберләре ясау буенча мастер-классларда бик теләп катнаштылар. Кыр кухнясы аеруча популярлык казанды, анда барлык теләүчеләрне сугыш елларының авыр көннәрен искә төшерә торган солдат боткасы белән сыйладылар. 5 нче шәһәр китапханәсе «Үткәнне хәтерләгәндә генә безнең киләчәгебез бар» дигән темага китап күргәзмәсе әзерләгән.
Татарстан Республикасы Дәүләт алкоголь инспекциясенең Түбән Кама территориаль органының эчке базарны үстерү һәм координацияләү бүлеге хезмәткәрләре дә бу чарада катнаштылар, халыкка кулланучылар базары өлкәсендә белешмә-мәгълүмати материаллар тәкъдим иттеләр. Бөек Җиңүнең 80 еллыгына багышланган бу бәйрәм геройларны искә алу, бердәмлек һәм патриотизм рухын тою өчен менә дигән мөмкинлек булды. Без бәйрәм атмосферасын булдыруга үз өлешебезне кертүебезгә һәм фестиваль кунакларына файдалы мәгълүмат белән уртаклашуыбызга бик шатбыз.