Балачак җәйе
Мәктәп каникуллары башлану - һәр бала өчен якты хис-кичерешләр һәм онытылмас маҗаралар чоры. Нәкъ менә шуңа күрә илнең күп шәһәрләрендә төрле яшьтәге балалар өчен махсус күңел ачу чаралары программалары эшләнде. Алар арасында - мавыктыргыч экскурсияләр, кызыклы мастер-класслар, күңелле ярминкәләр һәм мәдәни вакыйгалар.
Татарстан Республикасы Дәүләт алкоголь инспекциясенең Түбән Кама территориаль органының эчке базарын үстерү һәм координацияләү бүлеге тарафыннан оештырылган балалар активлыгы фестивале истә калырлык вакыйгаларның берсе булды. Ведомство хезмәткәрләре яшь катнашучылар өчен балигъ булмаган кулланучылар хокуклары турында кызыклы лекция әзерләде.
Бүген балалар еш кына кибеткә үзләре йөри, төрле товарлар, шул исәптән азык-төлек продуктлары да сатып ала. Әмма истә тотарга кирәк, кайбер сатып алулар өлкәннәр рөхсәте белән генә мөмкин. Мәсәлән, РФ Гражданлык кодексы нигезендә, алты яшьтән кечерәк бала, гомумән, килешүләрне мөстәкыйль рәвештә төзү хокукына ия түгел. Ә менә алты яшьтән өлкәнрәк яшүсмерләр инде вак-төяк көнкүреш продукциясен сатып алырга мөмкин, аның бәясе зур булмасын һәм бары тик шәхси куллану өчен генә билгеләнгән булырга тиеш. Мондый сатып алуларны вак көнкүреш килешүләре дип атыйлар.
Моннан тыш, ундүрт яшьтән унсигез яшькә кадәрге балалар шулай ук сатып алу мөмкинлегенә ия, әмма кайвакыт ата-аналарның, законлы вәкилләрнең яисә тиешле дәүләт органнарының алдан ризалыгы кирәк булачак.
Татарстан Республикасы Дәүләт алкоголь инспекциясе хезмәткәрләре балаларга законнарның барлык нечкәлекләре турында гади тел белән сөйләделәр, кулланучы тормышының хокукый аспектларын яхшырак ачыкларга ярдәм иттеләр. Чара нәтиҗәләре өметләрне аклады: бәйрәмнең уңай атмосферасы эмоциональ күтәрелешкә ярдәм итте, сабыйларны яңа ачышларга рухландырды һәм күңелле тәэсирләр калдырды!
Программа кызыклы һәм бай булып чыкты, яшь катнашучыларга вакытны күңелле һәм файдалы итеп үткәрергә, иҗади сәләтне үстерергә һәм белем дәрәҗәсен киңәйтергә мөмкинлек бирде. Хәзер балалар үз хокуклары турында күбрәк белә, һәм аларны көндәлек тормышта ышанычлы якларга әзер.