Гражданнар җентекле җаваплар һәм аңлатмалар алды
Татарстан Республикасы Әтнә муниципаль районының Олы Мәңгәр авыл җирлегендә кулланучылар хокукларын яклау һәм алкоголь продукциясен сату өлкәсендәге мәсьәләләр буенча гражданнарны күчмә кабул итү уздырылды. Кабул итүне Татарстан Республикасы Дәүләт алкоголь инспекциясенең Арча территориаль органы эчке базарны үстерү һәм координацияләү бүлеге башлыгы Ләйсән Абдуллина алып барды. Чарада авыл халкы һәм авыл җирлеге хезмәткәрләре катнашты.
Кулланучылар үзләренең сораулары белән килделәр, шул исәптән үлчәме һәм формасы буенча туры килмәгән товарларны кире кайтарганда хокуклар, техник яктан катлаулы көнкүреш товарларында җитешсезлекләр барлыкка килү, вакыты чыккан азык-төлек товарлары турында, Интернет-ресурслар аша сатып алынган товарларның проблемаларын хәл итү белән кызыксындылар. Барлык сорауларга да гражданнар кулланучылар хокукларын яклау өлкәсендәге законнар нигезендә бозылган хокукларны гамәлгә ашыру тәртибе турында җентекле җаваплар һәм аңлатмалар алдылар.
Чара азагында авыл җирлеге хезмәткәрләре өчен, территориаль орган мөрәҗәгатьләрен карау практикасыннан мисаллар кулланып, кулланучылар хокукларын яклау турындагы законнарны аңлатып, укулар үткәрелде.
Чарада катнашучыларның барысына да кулланучылар хокукларын яклау өлкәсенә кагылышлы мәгълүмати белешмәләр тапшырылды.